Xəbər verdiyimiz kimi təqsirləndirilən şəxsin vəkili tərəfindən rəy vermiş ekspertlərin və Respublikanın Baş Anestezioloqunun məhkəməyə dəvət olunması və bu ziddiyətlərə aydınlıq gətirilməsi barədə vəsadət qaldırılmışdı. Vəsadət təmin olunmuş və həmin şəxslər məhkəmə iclasına çağırılmışdılar.

Ekspert qismində dindirilən Azər Dəmirov və Elmira Hüseynova verilən eyni suallara tamamilə fərqli cavablar verərək öz verdikləri rəyi şübhə altına qoyublar. Həmçinin mütəxəssis qismində ekspertizsya rəy vermiş anestezioloq Ramiz Məmmədov verilən sualları cavablandıraraq ölümün səbəbinin anestezioloji ağırlaşma olmadığını, ölümün eləcə də qusmanın kalipsol preparatı ilə əlaqədar olmadığını, uşağın ölümünün anestezioloji ağırlaşma və İsmayıl həkimin fəaliyyəti ilə heç bir əlaqəsi olmadığını məhkəmə iştirakçılarının nəzərinə çatdırıb.

Hakimin və ittihamçı prokurorun "verdiyiniz ifadə ilə imzaladığınız ekspert rəyi tamamilə bir-birinə ziddir, belə olan halda yazılmış rəyi niyə imzalamısınız?" sualına cavab olaraq Ramiz Məmmədov bildirib ki, mən rəylə tanış deyiləm, orada nə yazıldığını da bilmirəm. O daha sonra bildirib ki, onu Baş Ekspertiza İdarəsinə çağıraraq hazır rəyi təqdim etdikdən sonra deyiblər ki, guya bir anestezioloqu nahaqdan günahlandırırlar və ona kömək lazımdır.

"Mən də onlara inanaraq, rəylə tanış olmadan qol çəkmişəm. İndi mənə aydın olur ki, onlar məni aldadıblar”.

Daha sonra Respublikanın Baş Anestezioloqu Aydın Qədirov da ifadə verib. A.Qədirov ona verilən suallara cavab olaraq İsmayıl Qənbərovun fəaliyyətində ölümə gətirən halların olmadığını ətraflı izah edib və ölümün anestezioloji ağırlaşma nəticəsində deyil, əməliyyatdan sonra xəstənin yedizdirilərək qusması nəticəsində baş verməsini bildirib:

"Burada anestezioloqun heç bir günahı yoxdur. Təqsirləndirilən şəxsin vəkili Əli Hüseynov tərəfindən ekspertlərə ünvanlanmış "Məhkəmə qərarında aydın şəkildə göstərilmişdir ki, ekspert rəyinin verilməsi üçün Respublikanın Baş Anestezioloqu Aydın Qədirov dəvət edilsin. Nəyə görə Baş Ekspertiza İdarəsi məhkəmə qərarını kobud şəkildə pozaraq Baş Anestezioloq əvəzinə assistent Ramiz Məmmədovu ekspertiza rəyinə cəlb etmişdir?" sualına isə ekspertlər cavab tapa bilməyiblər.

Bununla da məhkəmə iclası sona çatıb. Növbəti iclasın vaxtı isə mart ayının 7-ə təyin edilib.

Xeberle.com