Rusiyanın postsovet məkanında yaratdığı münaqişə ocaqlarının sayı artdıqca, bu təhlükələrin Avropaya da sıçrayacağı ehtimalları artır. Moldova üçün Dnestryanı münaqişəni miras qoyan, Ukraynada böyük separatizm təhdidi yaradan Rusiyanın ambisiyalarının miqyasının genişlənəcəyi barədə dəfələrlə rəsmi və qeyri-rəsmi səviyyələrdə xəbərdarlıqlar edilib. 
Hazırda isə bütün diqqət və proqnozlar Rusiyanın Baltikyanı ölkələrdəki maraqları və bundan irəli gələn yeni konflikt məkanının yaradılması üzərində fokuslanıb. 
Böyük Britaniyanın nüfuzlu "Financial Times" nəşri  Rusiyanın Baltikyanı dövlətləri ələ keçirmə ehtimalları ilə bağlı analitik məqalə dərc edib.

"Rusiya Estoniya, Latviya və Litvanı əldə etməyə çalışacaqmı" başlıqlı yazıda bildirilib ki, rəsmi Moskvanın Qərblə qarşıdurmaya cəhd etməsi olduqca şübhəlidir. Lakin Ukrayna münaqişəsi göstərdi ki, Rusiya tez-tez qonşu dövlətlərə müdaxilə etmək üçün etnik səbəbləri əsas gətirir. Baltikyanı ölkələrin əhalisinin dörddə biri isə ruslardır və Estoniya, Latviya, Litvada Rusiyanın mümkün hərbi müdaxiləsi ilə bağlı ciddi qorxular mövcuddur. 
Baltikyanı ölkələrdə münaqişənin necə başlanması ilə əlaqədar versiyalar irəli sürən sözügedən media orqanı yazıb ki, Rusiyanın provakasiyaı ilə yerli millətçilər və etnik ruslar arasında milli zəmində qarşıdurma yarana bilər. Həmçinin etnik rusların statusu, sərhədçilər arasında atışma, Baltik dənizinin üzərindəki hava məkanında Rusiya ilə NATO hərbi hava qüvvələrinin qarşıdurmaya gedəcəyi yer alan proqnozlar arasındadır. 
Rusiya bu ölkələrin silahlı qüvvələrinin kiçik kontingentini və zəifliyini nəzərə alaraq sürətli hərbi əməliyyatlara starat verə bilər. Etnik kartdan istifadə ilə paralel olaraq Rusiyanın Baltikyanı dövlətlərdə yerləşən liman, dəmir yolları və aeroportları tutmaq ehtimalları da güclüdür. 
Ən təhlükəli ssenari isə münaqişənin taktiki nüvə silahı tətbiqinə gətirib çıxarması variantı ilə bağlıdır. Taktik nüvə silahlarının istifadə olunması mümkün eskalasiyaya şərait yaradar və strateji nüvə zərbələrinin endirilməsi ilə müşayiət oluna bilər. 
Bəs Rusiya Baltikyanı regionda qələbə qazanacağı təqdirdə, bunun təsirlər arealları hara qədər gedib çıxacaq? Rusiya Baltikyanı bölgə uğrunda aparılan mübarizədə dünyanın ən böyük hərbi-siyasi təşkilatı NATO-nu məğlub edərsə, bu, postsovet ölkələrini qorxuya salacaq. 
"Financial Times"in bildirdiyinə görə çox güman ki, belə olan  halda Azərbaycan, Qazaxıstan və Özbəkistan Avrasiyada Rusiyanın hegemonluğu ilə barışmalı olacaqlar.  (modern.az)