Sumqayıt şəhərində fəaliyyət göstərən "Dünya TV" kanalı növbəti oğurluq hadisəsində ittiham olunur. İttihama görə, telekanalın rəhbəri Ramiz Hüseynovun oğlu Əli Hüseynov gənc şair Xəzər Süleymanlının ‘’Mən xöşbəxt deyiləm ki’’ şeirini oğurlayaraq öz adına çıxarıb. Hətta bu şeirə müğənni Nazəninlə klip də çəkdirib. Bu azmış kimi digər verilişlərə bu şeirin müəllifi kimi çıxmaqdan da çəkinməyib. Müəllifin sözlərinə görə bu şer 2013-cü ildə yazılıb. Hətta buna sübut da var. Bundan yeni xəbər tutduğunu söyləyən müəllif Xəzər Süleymanlı bildirir ki, tez bir zamanda bu məsələyə qarşı tədbir görülməzsə, aidiyyəti orqanlara müraciət edəcək.
Məsələ ilə bağlı adı çəkilən Əli Hüseynovla əlaqə saxladıq. O bildirdi ki, müəllifin bu məsələni böyütdüyünü başa düşə bilmir:"Biz bu sənətdə fəaliyyət göstərəndə, elələri harda idi?! Mən onun özüylə danışmışam, məsələni yoluna qoyacam."
Xatırladaq ki, bu yaxınlarda Xaçmazda yayımlanan RTV (Region TV) 5 mövsüm efirdə yayımlanmış məşhur "Unudulmayan ifalar” verilişinin adını, RTV tərəfindən hazırlanan videobaşlıqları, hətta RTV əməkdaşları tərəfindən səsləndirilmiş hazır materialları "Dünya” TV-ni özününküləşdirdiyi ilə bağlı ittiham etmişdi. Məsələ ilə bağlı telekanalın prezidenti Ramiz Hüseynov həmkarlarının yaydığı məlumatı əsassız adlandırmışdı. DTV-də yayımlanan eyniadlı proqramın aparıcısı Samir Bayramlı da deyilənlərlə razılaşmamışdı.
Xeberle.com