Bir neçə gün əvvəl, öz təşəbbüsümlə, yeni layihəmə başladığımı qeyd etmişdim. Təvazökarlıqdan uzaq olsa da, qeyd edim ki, ilk addım gözlədiyimdən də gözəl, uğurlu alındı...
Tədbir, 30 ilə yaxın zamanda bir ictimaiyyətçi, pedaqoq, şair... kimi tanıdığım, 80 illik yubileyində isə, münasibətlərimizin daha da yaxınlaşdığı gündən dostluğa çevrilən Qənirə Mehdixanlıya həsr olundu.
58 illik pedaqoji staja malik olan sevimli Dostum bir çox istedadlara malik olan, xeyirxah əməlləri saya gəlməyən böyük ürək sahibi idi. O, gözəl xasiyyəti, səmimiyyəti, sadəliyi, mehribanlığı ilə kiçikdən-böyüyə hər kəsin sevgisini qazanan, sözünün, hərəkətinin yerini bilən ziyalı xanım olmaqla yanaşı, ağlı, zəkası, iti yaddaşı ilə hamını heyran edirdi. Haqsızlıqla barışmayan, yalanı qəbul etməyən, vicdanlı, mübariz, prinsipial, əqidəli, məsləkli... idi mənim Dostum!
Təqaüdə çıxsa da, həyat eşqli, pozitiv, tükənməz enerjili Qənirə xanım məsuliyyətli bir işin öhdəsindən gəlirdi. O, Azərbaycan Aşıqlar Birliyinin Sumqayıt Regional Bölməsinin sədri idi. Şəhər rəhbərliyinin tapşırığı ilə, bölməyə Sumqayıt Poeziya Evində yer verilmişdi. Necə böyük həvəs, sevgi, məsuliyyət hissi ilə iş yerinə, sevimli aşıqlarının yanına tələsərdi, bircə görsəydiniz...
Qənirə xanım əsl vətənpərvər idi. O da müharibənin acısını yaşayırdı. Qardaşı oğlu Vasif Xəlil oğlu Mehdiyev I Qarabağ müharibəsində itkin düşmüşdü. Onun son döyüşü Ağdam rayonunun Naxçıvanik kəndi uğrunda olmuşdu. Gözləri yol çəkən bu insanların nələr çəkdiklərini təsəvvür etmək çətin deyil... Bəlkə, elə bu səbəbdən idi ki, o, Şəhid Analarının, ailələrinin yanında mənəvi rahatlıq, təskinlik tapar, onlara dəstək olmağa çalışardı.
Hər ikimizin birgə təşkilatçılığı ilə, Şəhidlərimizlə bağlı, bir neçə tədbirlərə imza atdıq. O, necə də sevinərdi... Bu sevincdə bir uşaq məsumluğu duyulardı…
2019-cu ilin dekabr ayında, Sumqayıtın ad günü ilə bağlı, təsisçisi və rəhbəri olduğum "VİP" Mərkəzi ilə Qənirə xanımın rəhbəri olduğu Sumqayıt RAB-ın birgə təşkilatçılığı ilə, "Kimyaçılar" sarayında respublikanın tanınmış aşıqlarının və gənc aşıqların maraqlı çıxışları oldu. Həqiqətən də, tamaşaçıların bu günəcən unutmadığı möhtəşəm bir tədbirə imza atılmışdı. Günlər, aylar keçsə də, həmin konsertdən xoş təəssüratlar bizi tərk etmirdi və biz gələcək üçün yeni planlar çızırdıq. Hələ çox görüləsi işlərimiz vardı...
25.06.2022-ci il... Sübh tezdən gəlini zəng edib, üzüntülü halda dostumun rəhmətə getdiyini bildirdi. Şok olmuşdum. Necə yəni? Bir gün əvvəl "Qala" restoranında, təmiz havada əyləşib, çay süfrəsi arxasında söhbət edirdik. Demirəm ki, şirin söhbət, dərdini bölüşürdü... İçi dolu, deməyə sözü çox idi. Söz verdim ki, işimi qurtarım, iki gün sonar, ayın 27-si görüşərik. Başım vacib bir yazıya qarışdığından, məni tez-tez narahat etməkdən çəkinirdi; "bilirəm, işiniz çoxdur, zəng edib mane olaram". Necə də sadə, təvazökar, yeri gələndə üzr istəməyi bacaran BÖYÜK İNSAN idi bizim Qənirə xanım! Bilirdi ki, "sən" müraciətini çox da sevən deyiləm, "siz"lə danışardı. Hərdən dilindən "sən" kəlməsi çıxanda, tez də deyərdi, "üzürlü sayın", ya da ki, gülümsəyərək ərklə deyərdi; "yox ey, elə "sən" deyirəm: həm səndən böyüyəm, həm də sən mənim qızımsan, hətta qızımdan da irəlisən mənə!”. Ancaq sonra yenə "siz" lə söhbətinə davam edərdi... Aramızdakı müəyyən yaş fərqinə baxmayaraq, bir çox xasiyyətimiz, xarakterimiz uyğun gəlirdi. Bu səbəbdən, yaş fərqini hiss etməzdik... Nə isə... xatirələr ağuşuna aldı məni, mətləbdən uzaqlaşdım... Yəni, Qənirə xanım, çox diqqətcil, ədəb-ərkanlı, qayğıkeş, zövqlü, təmizkarlığı sevən, nəzakətli, xanım-xatın Qadın idi.
Təsadüfdən həmin gün – iyunun 25-də dəyərli jurnalist həmkarlarımın yaratdığı "xeberle.com" saytının 10 illik yubileyi idi. Dəvətliydim. Qənirə xanımgilə tələsdim. Saat 8, 9... Zaman ağır-ağır keçirdi sanki... Qənirə xanımın nəşinin mənzilə gətirilməsi bir neçə saat çəkəcəkdi. Mənzil dostumsuz mənə çoooxxxx dar gəldi... mən onun özünü görməyə, səsini eşitməyə alışmışdım...
Yaxınlarından icazə alıb tədbirə tələsdim ki, gedibdəyim və tez də qayıdım. Getməyə də bilməzdim. Çünki istedadlı, perspektivli, savadlı və obyektiv olan bu gənclərə çox böyük hörmətim vardı. Ancaq orada nələr yaşadım, Allah bilir. Bir tərəfdən möhkəm dost olan həmkarlarımın - Kamal Əlimuradlı, Elnur Ağayev və Ramil Zeynallının sevincinə şərik olaraq sevinirdimsə, digər tərəfdən göz yaşlarımı saxlaya bilmirdim. Necə də çətindir bir anda iki hissi yaşamaq. Heç kəs heç nə bilmirdi. Kənardan mənə dikilən təəccüb dolu baxışları gördükcə daha da sıxılır, utanırdım... Ağzımı açıb bir kəlmə də deyə bilmirdim, qəhər məni boğurdu… Nəhayət, Ramil bəyə dostumuzu itirdiyimizi söylədim və üzrxahlıq edib, oradan birbaşa Qənirə xanımın yeri görünən mənzilə getdim. Xeyli insan var idi otaqda. Hər kəs Qənirə xanımın xeyirxahlığından ağızdolusu danışırdı... Həmin anda beynimdən bir fikir keçdi: "Bu şəhər Qənirə Mehdixanlısız qaldı... onun üçün çoooxxx darıxacağıq..."...
Jurnalist həmkarım, dəyərlimiz Rəhman Orxan rəhmətə gedəndə, yas mərasimində ani olaraq beynimdən bir fikir keçdi: "Yaddan çıxmaz Rəhman Orxan!". Bəli, belə insanları unuda bilmərik! Unutsaq, bir gün biz də unudularıq. Axı, bu insanların hər biri öz çalışdığı sahədə şəhər üçün, ölkə üçün nəsə ediblər və bunu hər kəs, gələcək nəsillər də bilməlidir. Təəssüf ki, unudulanlar siyahısında çox insanlar var idi; Ağaddin Mansurzadə, Sevil Bayramova, Kamran Hacıyev, Xasay Cahangirov, Ucal Qasımov, Zərifə Təhməzova və saysız-hesabsız tanıyıb-tanımadıqlarımız...
Fikrimi Rəhman müəllimin qızı Mehriban xanıma bildirdim. Yanımızda dəyərlimiz Xatirə Fərəcli də var idi. Çox bəyəndilər fikrimi. Rəhman müəllimin ad günü üçün, iyul ayında tədbir keçirmək qərarına gəldim. İlk addım isə, demə, Qənirə xanımın qismətində imiş.
25.06.2024-cü il tarixində, elə Qənirə xanımın doğma məkanında - Sumqayıt Poeziya Evində, Azərbaycan Aşıqlar Birliyinin Sumqayıt Regional Bölməsi ilə birlikdə, "Yaddan çıxmaz QƏNİRƏ MEHDİXANLI!" adlı tədbir baş tutdu. Onu da qeyd edim ki, təşəbbüsümü AAB-nin sədri professor Məhərrəm Qasımlı da çox bəyəndi. (Təşəkkür edirəm!).
Qənirə xanım rəhmətə gedəndən sonra, onun vəzifəsinə təyinat olmamışdı. Bu günlərdə seçki yolu ilə, Ustad Aşıq Çərkəz Qurbanov bölmənin rəhbəri təyin olundu. (Yeni vəzifədə Çərkəz bəyə uğurlar diləyirəm!).
Tədbirin həyata keçməsində razılığa, yaratdığı şəraitə və diqqətə görə, Abşeron-Xızı Regional Mədəniyyət İdarəsinin sədri cənab Ramil Rəhimova, hər iki təşkilat adından, TƏŞƏKKÜRLƏR!
Həmçinin, Ə.Kərim adına Sumqayıt Poeziya Evinin direktoru İbrahim Hajıyev başda olmaqla, yanımzda olan və bizi dəstəkləyən mehriban kollektivə minnətdarlığımızı bildiririk.
Sevindirici o idi ki, şəxsən 4-5 nəfərə zəng edib tədbirə dəvət etmişdim, zal isə tamamilə dolmuşdu. Bu, elanı oxuyub tədbirdə iştirak etmək istəyən QƏNİRƏSEVƏRLƏRİN sayəsində olmuşdu.
Tədbir iştirakçıları əvvəlcə zalda təşkil olunan sərgi ilə yaxından tanış oldular. Burada Qənirə xanımın əl işlərindən (ilmələrlə naxış vurma) ibarət rəsm əsərləri nümayiş olundu.
Tədbir Dövlət Himninin səslənməsi ilə başladı. Daha sonra, Vətənin azadlığı və bütövlüyü uğrunda canlarından keçən İgidlərimizin - Şəhidlərimizin əziz xatirəsi bir dəqiqəlik sükutla yad edildi. Qənirə xanımın ömür hekayəsini, keçdiyi həyat yolunu özündə əks etdirən videoçarx hər kəsi kövrəltdi. Qənirə xanımla bağlı xatirələr vərəqləndi, ürək sözləri dilə gəldi, şeirlər şöylənildi, şairin sözlərinə aşıqların hazırladıqları aşıq havaları səsləndi. Bütün tədbir iştirakçıları, bir kəlmə də olsa, fikir bildirdilər. Qənirə xanımın öz ifasında səslənən şeir əks olunan videokadrı həyacansız izləmək qeyri-mümkün idi...
Sumqayıt Şəhər İcra Hakimiyyətinin nümayəndəsi, şöbə müdiri Fərman Kazımov, Respublikanın Əməkdar müəllimi, şair Ofelya Babayeva, SRAB-ın rəhbəri Çərkəz Qurbanov, təhsil sahəsində silinməz imzaları olan pedaqoqlar - Sevil Kamilova, Solmaz Sultanova, Husniyye İbrahimova, SDU-nun müəllimi Aybəniz Hüseynova; tanınmış qələm adamları - QHT və sayt rəhbəri, şair Xatirə Fərəcli; Cənubi Azərbaycandan olan söz adamı, şair Yaqub Usuli bəy və xanımı Arzu xanım; jurnalist-şair, sayt rəhbəri Namiq Dəlidağlı, şair, yazıçı-jurnalistlər Sevinc Qərib, Rena Tebessum, şair-türkoloq Xaqani Abbasəli, hüquqşünas-şair Ədalət Qafarov, şair Elbrus Qayalı və digər qonaqlar Qənirə Mehdixanlını xoş xatirələrlə yada saldılar, onun cəmiyyət üçün etdiyi gərəkli işləri xüsusi vurğuladılar. Qənirə xanımın əməllərini eşidib, özünü şəxsən tanımayan insanlar isə, tədbirdən duyğulandıqlarını qeyd etdilər. Və belə bir insanla bağlı daha çox məlumatlandıqlarını vurğulayaraq, onu şəxsən tanımadıqlarına heyfsiləndiklərini bildirdilər.
Jürnalist həmkarımız, şair Aynurə Teymurova bu dəfə də əməli ilə fərqləndi. O, ürək sözlərini söyləməklə yanaşı, canlı yayıma cıxmaqla, minlərlə insanı Qənirə xanımın işığına topladı. (Təşəkkürlər, Aynurə xanım!).
Xüsusi minnətdarlığımı bildirmək istəyirəm, bizim hər zaman "FƏDAİ" adlandırdığımız, sənətinin vurğunu olan kitabxanaçılarımıza. Sumqayıt Mərkəzləşdirilmiş Kitabxanalar Sisteminin m.müdiri Təranə xanım Hüsiyeva başda olmaqla, bütün kitabxanaçılarımıza, tədbirdə fəal iştiraka görə, "hər zaman VAR olun!" deyirəm.
Tədbiri gözəlləşdirən, mənalı və rəngarəng edən Qəhrəman oğulların - ŞƏHİDLƏRimizin qeyrətli, vüqarlı Analarının iştirakı oldu. ŞƏHİD ANAları əllərindəki qızılgülləri Qənirə xanımın portreti qarşısını qoyub ürək sözlərini söylədilər.
Əllərinizdən öpürük, əzizlərimiz! Sağ olun ki, Vətənə belə layaqətli, igid oğullar böyütmüsüz! Nə yaxşı ki VARsız, nə yaxşı ki, bizlər sizləri tanıdıq!!! Allah sizləri qorusun!
Ruhu şad olsun, "Azad və Bütöv Azərbaycan!" naminə Haqq savaşında QALİBİYYƏT qazanan, ZƏFƏRə imza atan, Şəhidlik Zirvəsini fəth edən Vətən sevdalı ŞƏHİDLƏRimizin!!! Amin!
Tədbirin sonunda, Qənirə xanımın əziz-doğmaları adından, Mənsurə xanım çıxış edərək, təşkilatçılara öz dərin təşəkkürünü bildirdi.
Tədbir Qənirəsevərlərin birgə şəklinin çəkilməsi və çay süfrəsi arxasında davam edən şirin söhbət ilə yaddaşa həkk olundu.
Əminəm ki, peşəkar Aşıqlarımızın - Nəriman Abbasovun, Çərkəz Qurbanovun, Сəmil Muradov, Ceyhun Nağıyevin, Həvva Nəsiblinin, Ramil Əfəndiyevin, Nəcəf Kəlbəcərlinin, Tacəddin Abdinovun, Əlisəfa Zərbəliyevin (qavalçı), Mehman Abbasovun (balabançı) və digərlərinin ifaları ürəklərdə silinməz iz qoydu.
Beləcə, "ViP" Mərkəzinin "YADDAN ÇIXMAZ..." layihəsi əsasında, Mərkəzin və AAB SRB-nin birgə təşkilatçılığı ilə, həyatda öz dəsti-xətti olan, savadı, bacarığı, insaniyyətliyiylə könüllərin rəğbətini qazanan Qənirə xanıma həsr olunmuş tədbir uğurla sonlandı. İnanıram ki, Vətən və milləti üçün çalışan xeyirxah, nəcib insanlar hər zaman yaddaşlarda qalacaq, qəlblərdə yaşayacaqlar!!!
Aygün Hacıyeva,
AJB, AYB və AAB-nin üzvü
Xəbərdən istifadə edərkən istinad etmək vacibdir.
