Sumqayıtda S. Vurğun adına Mərkəzi kitabxanada qüdrətli hökmdar və şair Şah İsmayıl Xətaiyə həsr olunmuş "Bir əlində qılınc, birində qələm” adlı biblioqrafik göstəricinin təqdimatı keçirilib.
Məlumat biblioqrafiya şöbəsinin böyük metodisti Natəvan Axundzadə SDU-nun müəllimlərini və Tarix fakültəsinin tələbələrini salamlayaraq tədbir haqqında qısa məlumat verib. Kitabxananın baş biblioqrafı Nazxanım Cəfərova tərtibatçısı olduğu biblioqrafik vəsaitin məqsədi, məramı, istifadəçilər üçün məlumat mənbəyi olaraq əhəmiyyətini xüsusi qeyd edərək onun bölmə və yarımbölmələri haqqında ətraflı məlumat verib.
Tədbir iştirakçıları həmçinin, biblioqrafın zalda nümayiş etdirilən "Hökmdar, sərkərdə, şair” başlıqlı sərgidəki ədəbiyyatlar haqqında xülasəsini diqqətlə dinləyiblər. Tədbirə dəvət olunmuş BDU-nun müəllimi, fəlsəfə elmləri doktoru Aydın Məmmədov tarixi mənbələrə istinadla onun hökmdarlıq, döyüşçülük bacarığı, dövlət idarəetmə mədəniyyəti, həmçinin Şah İsmayıl Xətainin mütərəqqi ideyaları və bədii yaradıcılıq sahəsindəki fitri istedadı haqqında fikirlərini tədbir iştirakçıları ilə bölüşüb.
Sonda A. Məmmədov və SDU-nun müəllimi Şəhla Əhmədova qədim dövlətçilik ənənələri ilə tanınan Azərbaycan xalqının tarixində əhəmiyyətli rolu olan Şah İsmayıl Xətaiyə həsr olunmuş belə gözəl tədbirin tariximizin, milli-mənəvi dəyərlərimizin təbliğində mühüm rolunu xüsusi qeyd edərək tədbirin təşkilatçılarına təşəkkürünü bildirib. 
Xeberle.com