Bu günlərdə istedadlı şair Sabir Yusifoğlu öz "facebook” səhifəsində şeirlərini satmaq qərarına gəldiyini bəyan etdi və fikirini aşağıdakı kimi əsaslandırdı: "Ali təhsilli mühəndisəm. 2000-ci ildə Prezidentin fərdi təqaüdünə layiq görülmüşəm-ədəbiyyat sahəsində. Son vaxtlar səhhətimlə bağlı işləmirəm (osteoxondroz-duz yığılması. Ağrı, yuxusuzluq, əsəb, təzyiq-daha çox nəmli, küləkli havalarda) . Keçmişə baş çəkməyə, öz arxivimdə eşələnməyə bolluca vaxtım oldu... Və bir neçə kitablıq, heç harda getməyən şeirlərimə bir daha baxdım. İmkanlı birisinə bu şeirlər şöhrət gətirə bilər. Mən isə sağlamlığımı bərpa edərəm. Qısası: o yazıları satıram. İstənilən redaktə də mənlik. Məxfiliyə(inkoqnito) söz verirəm.” 

S. Yusifoğlunun bu bəyanatı dostları və şəbəkə istifadəçiləri tərəfindən heç də birmənalı qarşılanmadı. Ona öz yardımlarını təklif edənlərlə yanaşı, qınayanlar da oldu. Bəs, Sabir Yusifoğlunu şəxsən tanıyan, onunla eyni şəhərdə yaşayıb-yaradan həmkarlarının sözügedən məsələylə bağlı fikri nədir? 

Aydınlıq gətirmək istədik... 

-İllərdir ki, "ədəbi səngər”də çiyin-çiyinə vuruşduğunuz bir həmkarınızın bu "məğlubiyyətinə” münasibətiniz necədir?

"Alıcıdan çox alıcımız var”.

İbrahim İlyaslı, şair: "Özünə də demişəm. Sizə də bildirirəm - Sabir nahaq dağa-daşa düşür, sözümüz varsa bazarımız da var. Gəlsin POEZİYA klubuna, matahının dəyərini desin. Alıcıdan çox alıcımız var”.


İbrahim İlyaslı

"Yaxşı pul versələr istənilən romanımı, hekayəmi sataram”.

Əyyub Qiyas, yazıçı-dramaturq: "Sabir Yusifoğlu çox istedadlı şair, çox dəyərli qələm adamı və mənim 30 illik dostumdur. Sabir səhhəti ilə bağlı bir sıra problemlərlə üzləşdi və belə məqamlarda insan canının sağlığından başqa hər şeyin dəyərsiz olduğunu dərk edir. Bu addımı atmaq - yəni şeirləri satmaq anonsu bir növ Sabirin can sağlığından başqa hər şeyə bir etirazı, bir üsyanı idi. Sözün dəyərdən düşdüyü, hər kəsin "şairləşdiyi" bir zəmanədə Sabir kimi gerçək, maskasız, səmimi söz adamlarının yaşamağı bəzən zor olur. Amma bu ötəri bir şeydir. Və ümumiyyətlə, ədəbiyyat tarixində içi Məhəmməd Hadi də daxil, sözünü, şeirini satan adamlar az olmayıb. Elə mənə də yaxşı pul versələr istənilən romanımı, hekayəmi sataram. Çünki bizim istehsalımız, əmtəəmiz sözdür. Başqa nə satasıyıq ki? Sabirə can sağlığı arzulayıram. Özü demiş: -Qalan hər şey boş şeydir!”


Əyyub Qiyas

"Şeirlərini satmaq özünü satmaq kimidir.”

Süleyman Hüseynov, şair-publisist: "Sabir Yusifoğlunu 20 ildən artıqdır ki,tanıyıram.İstedadlı qələm sahibidir.Şeirlərindəki fəlsəfə diqqəti daha çox cəlb edir.Kövrək duyğularla yanaşı qəlbindəki üsyanlar-haqsızlığa,xəyanətə,sosial ədalətsizliyə barışmaz mövqe də öz əksini tapır.Bu onun öz şəxsi xarakterindən irəli gəlir.Ürəyi təmizdir,halal çörəklidir,bir az kövrək, bir az çılğın,dəliqanlı,səbrsiz, düşündüyünü üzə deyəndir.Siyasət onluq deyil.Düşünürəm ki,məhz bu xasiyyəti həyatda həmişə onun üçün problem yaradıb.Nəticədə maddi tələbatını ödəmək üçün istedadlı yazar şeirlərini satmaq mesajını verib.Əslində burda qeyri-adi heç nə yoxdur. Dünyada təsadüf edildiyi kimi,bizdə də belə hallar mövcuddur. Müəyyən şərtlər daxilində başqaları üçün şeir,kitab, elmi məqalə, elmi iş yazanlarımız var.

Süleyman Hüseynov

Baxmayaraq ki,çox vaxt bunu sübut etmək çətin olur, amma fakt faktlığında qalır. Qaldı ki,Sabir bəyin bu hərəkətinə, düzü inanmıram o, bunu tam ciddi qərarlaşdırıb. Fikrimcə bununla ictimaiyyətin fikrini tək özünə deyil, özü kimi digər istedadlı, lakin diqqətdən kənar qalan yazarların vəziyyətinə cəlb etmək istəyir. Digər tərəfdən "müştəri"lər tapıldıqda, daha çox informasiya əldə edib, cəmiyyətdəki çirkablığı tam açıqlığı ilə göstərmək istəyir. Onun xasiyyətinə, qüruruna yaxşı bələd olduğumdan, onun bu cür hərəkət edəcəyinə inanmıram. Yox, əgər fikrimdə yanılsam, onda onun bu hərəkətini qəti pisləyirəm. Şeirlərini satmaq özünü satmaq kimidir. Sabir Yusifoğlu isə satılan oğul deyil!”
Moderator.az

Xəbərdən istifadə edərkən istinad etmək vacibdir.