Görüşlər zövqdü, görüşlər  təbliğatdı, görüşlər söz deyənlə söz duyan arasında  körpü,  yaradıcı insanın dinləyicilərinə hesabatıdı. Görüşlər məkanı, xatirələr ünvanı olan kitabxanalarımız insanları bir araya gətirib  nəğməkar şairlərimizlə, sözü dillərdə gəzən yazarlarımızla üz-üzə qoyur,  maraqlı, məzmunlu görüşlərlə insanların təhsilinə, şəxsi mütaliəsinə, asudə vaxtının daha mənalı, əyləncəli keçməsinə yardımçı olur. 

      Belə  tədbirlərdən biri də oxucuların sevə-sevə mütaliə etdiyi və yaradıcılığını  maraqla izlədiyi  istedadlı yazar Varislə oxucuların  görüşü  oldu. Mİracle Education and İnnovation Center  və S. Vurğun adına Mərkəzi Kitabxananın birgə təşkilatçılığı ilə oxu zalında gerçəkləşən  tədbiri  kitabxananın Abonement şöbəsinin müdiri Zemfira Mirzəyeva açaraq həmşəhərlimiz, müasir dövr yazıçıları arasında öz dəsti-xətti, yeri olan yazıçı Varis Yolçuyevi iştirakçılara təqdim etdi  və sözü  Tədris və İnnovasiya Mərkəzinin nümayəndəsi Vüsalə Tağıyevaya verdi. Vüsalə xanım bədii sözün qüdrətiylə ruhumuzu qidalandıran söz sahibləri ilə gənclərin görüşlərinin  təşkilatçısı olan Mərkəzin xoş məramını tədbir iştirakçıları ilə bölüşdü. Tədbirin açılışından sonra yazıçı Varis oxucularla baş-başa qaldı. 

     Görüş  çox  böyük  ruh  yüksəkliyi ilə keçdi. Sumqayıtlı yazar oxuculara öz yaradıcılığından, işıq üzü görən kitablarından söz açdı, gələcək planlarından danışdı, elimizin Qarabağ dərdinə vətəndaş  mövqeyindən nəzər saldı, gənclərimizi daha çox mütaliə etməyə, vətənpərvər olmağa, mübarizliyə səslədi. İştirakçılar maraqlı suallarla gənc  yazara müraciət  edərək  onun "Sonuncu ölən ümidlərdir”, "Sənə inanıram”, "Bir ovuc torpaq” və digər əsərləri ilə bağlı düşüncələrini bölüşdülər,  ayrı-ayrı obrazlara öz  münasibətlərini  bildirdilər. Gələcəyimiz olan  bu günkü gəncliyin tədbir boyu fəallığı bir daha sübut etdi ki, kitaba, mütaliəyə həvəs tükənməyib. Sadəcə  oxucunun qəlbinə yol tapmaq  lazımdır. 

      Bir-birindən oxunaqlı əsərləri, bədii sözün qüdrətiylə oxucuların qəlbinə yol tapan, əsərləri bu gün respublikamızın hüdudlarından kənarda da sevə-sevə oxunan istedadlı  yazara  biz də öz növbəmizdə uğurlar arzulayır və yeni-yeni  yaradıcılıq töhfələri  gözləyirik.