Respublikamızda dövlət tibb müəsissələrində göstərilən tibbi xidmətlər pulsuz olsa da, bəzi xəstəxana rəhbərləri bu qaydaya qətiyyən riayət etmir.

Bu yaxınlarda Sumqayıt şəhərindəki 1 və 2 saylı doğum evlərində yoxlamalara başlanılıb. Yoxlamalar şəhər sakinlərinin şikayətləri əsasında başlayıb, belə ki, sumqayıtlılar bu tibb müəssisələrinin fəaliyyətindəki nöqsan və çatışmazlıqlardan dəfələrlə narazılıq ediblər.

Bildiyiniz kimi, bu günlərdə Sumqayıt şəhər 2 saylı Doğum evinin baş həkimi İmmi Ələkbərova tutduğu vəzifədən azad edildi. Gözlənilən o idi ki bu, səhiyyə sahəsində çalışanlara bir dərs olacaq və neqativ əməllərindən əl çəkəcəklər.

Lakin görünən odur ki, mənfi hallar hələ də davam edir.

Bunu deməyə əsasımız da var. Belə ki, bu gün Sumqayıt şəhər sakini, Sabir Əsgərov Xeberle.com saytının elektron ünvanına şikayət məktubu ünvanlayıb. Şikayəti diqqətinizə çatdırırıq:
"Bu gün səhər hərbi formada həyat yoldaşımla Sumqayıt 1 saylı Doğum evinə getdik. Qeydiyyatdan keçmək üçün 2 saylı qadın məsləhətxanasından bura göndəriş verilir. Həyat yoldaşım tamamilə pulsuz olan qan verməliydi. İçəri girən həyat yoldaşım bir neçə saniyədən sonra çıxaraq həyəcanla "39 manat xidmət haqqı və əlavə olaraq 6 azn də EKQ-yə istəyirlər" dedi. Sözün düzü xətrimə ən çox dəyən məbləğ yox, hərbi formaya qoyulan bu hörmətsizlik oldu. "Problem yoxdur.Ödəyirəm.Ancaq zəhmət olmasa çeki verin." deyən kimi aləm qarışdı. Amma bununla da kifayətlənmədim. "İnsafınız olsun, dövlət xəstəxanasını açıq bazara çevirmisiniz və s." kimi sözlər dedim. Nəticədə TAMAMİLƏ PULSUZ analizləri verdik. Orada pul vermədiyimizi eşidən bir xanım təəccüblə 35 man verdim dedi.

Bunların heç nədən qorxusu yoxdur. Axı elə bu yaxınlarda baş həkimlərdən birini rüşvət qalmaqalından sonra işdən çıxardılar. Sözüm sağa-sola rüşvət paylayan millətimədir. Heç olmasa sizə dövlət tərəfindən təqdim olunan PULSUZ xidmətlərdən xəbəriniz olsun...”

Xeberle.com