"Klub müdirimizin sözünə görə rektor məni və rəqs müəllimini işdən çıxartdı. Bu universitetdə 13 illik zəhmətim var. Guya mən tərbiyəsizəm. Hamı bilir ki mən necə işləmişəm.”
Bu sözləri Sumqayıt Dövlət Universitetinin Bədii rəhbəri vəzifəsində çalışmış Vaqif İbrahim Xeberle.com-a ünvanladığı şikayət məktubunda qeyd edib. 
V.İbrahim bildirib ki, 2003-cü ildən SDU-da Bədii rəhbər vəzifəsində çalışıb və bu gunə kimi Novruz bayramında Keçəl obrazını oynayır: ”Ulu öndərimiz Heydər Əliyevin və cənab Prezidentimiz İlham Əliyevin iştirak etdiyi tədbirlərdə olmuşam. Həmişə işimdə düzgünlüyü, insanlığı, etikanı qorumuşam və tələbələrimə də bunu öyrədirəm. Universitetin rektoru Elxan müəllim bizə hörmətlə yanaşdı, nə çətinliyimiz oldusa, kömək elədi. İki il ərzində iki tamaşa hazırlayıb nümayiş etdirdik. Ümumiyyətlə çalışdığım müddət ərzində bütün tədbirlərin yüksək səviyyədə hazırlanmasında var gücümlə çalışmışam.
Bu yaxınlarda rektor universitetin klubuna Xalidə adlı bir xanımı müdir təyin etdi. Həmin xanım Filologiya fakültəsində çalışırdı. Bu xanım gəlib müdir keçən gündən bizimlə pis rəftar etməyə başladı. Gedib rektora bizdən şikayət edib. Bizi rektor çağırdı və danladı. Mənim hər bir tamaşamı baxıb bəyənib mükafat vermişdi. Amma iclasda deyir ki, sənin işlərini bəyənməmişəm. Guya tərbiyəsizəm. Halbuki məni bütün universitet tanıyır, necə tərbiyəli insan olduğumu bilir. Fəhlə ailəsində böyümüşəm, hər əzabı görmüşəm. Məndən heç bir işçi, tələbə narazı deyil. Heç kim məndən nəlayiq hərəkət görməyib. Kluba yeni təyin olunan müdir bizi rektora necə pisləyibsə, mən və rəqs müəlliməsi işdən çıxarıldı".
V.İbrahim şərlənərək işdən çıxarıldığını iddia edir: "Rektor  mənə dedi ki, sən tələbəyə mesaj yazmısan. Bu mənim şəxsi işimdir. İndi məni şərləyib işdən çıxardıblar. Banka kreditim var. Bir övladım var, onu saxlamaq, onun bağçası var, geyimi var. Bunlar bilmirlər ki Prezidentimizin və birinci xanım Mehriban xanımın göstərişi var ki, heç bir işçini bu çətin durumda işdən çıxartmaq olmaz. Bunlar bu qanuna əməl etmirlər. İstəyirəm rektor mənim öz işimə bərpa etsin. Bizə iclasda üstümüzə düşüb dedi ki, gedib ərizə yazın, yoxsa sizi maddə ilə qovacam. Mən ancaq öz işimlə məşğul idim, tədbir hazırla, tamaşalar hazırla və s.  Guya mən tərbiyəsizəm, tələbəyə gecə mesaj yazmışam. Onu da sübut edə bilərəm ki orda heç bir nalayiq hərəkət söhbət olmayıb. Bir xanımın sözünə görə məni günahlandırıb çıxardırlar işdən. Müdir gələnə kimi biz öz gözəl işimizi həmişə aparmışıq, tədbirləri də yüksək  səviyyədə keçirmişik. Mən öz zəhmətimlə alın tərimlə çalışmışam. Bir kəsə acı söz deməmişəm. Bunların insana hörməti budur?”.


Məsələ ilə bağlı SDU ilə əlaqə saxladıq. Mətbuat və ictimaiyyətlə əlaqələr xidmətinin rəisi Nazxanım Əzizova Xeberle.com-a bildirdi ki, Vaqif İbrahimin səsləndirdiyi iddiaların heç bir əsası yoxdur: "Vaqif İbrahim bir müddət öncə işdən icazə almadan xarici ölkələrdən birinə gedib. Sonradan məlum olub ki, o Türkiyədədir. Gələndən sonra  ona töhmət verilib. Ona dəfələrlə işində buraxdığı nöqsanlara görə xəbərdarlıq da edilib. Səsləndirdiyi fikirlərə gəldikdə isə onu heç kim işdən çıxarmayıb. O,özü işdən çıxması ilə bağlı ərizə ilə müraciət edib və buna görə də tutduğu vəzifədən azad edilib”.
Xeberle.com