Bolluğun, bərəkətin və xeyirxahlığın təcəssümü olan Novruz doğma Azərbaycanımızın hər yerində olduğu kimi, Sumqayıtda da böyük coşqu ilə qeyd edilib. 
Novruzun gəlişinə ciddi hazırlaşan sumqayıtlılar baharı milli musiqi sədaları altında böyük sevinc və ümidlə qarşılayıblar. Sonra alovlanan tonqal qədim oğuz yurdunun bir parçası olan Sumqayıtda novruz şənliyinin ən maraqlı məqamlarından biri olub. "Dədə Qorqud" xeyir-dua verərək, bahar bayramının millətimizə sülh, əmin-amanlıq, ruzi-bərəkət gətirməsini arzulayıb.
Sumqayıt şəhər İcra Hakimiyyətinin başçısı Zakir Fərəcovun, millət vəkillərinin, hüquq-muhafizə orqanlarının, idarə və təşkilat rəhbərlərinin, eləcə də ictimaiyyət nümayəndələrinin qatıldığı bayram şənliyində xalq oyunları, milli rəqslər, vətənimizi tərənnüm edən musiqilər, Keçəllə Kosanın məzəli əhvalatları, xoruz döyüşü, idmançıların rəngarəng çıxışları, kəndirbazların akrobatik hərəkətləri sumqayıtlıların əhval ruhiyyəsinə bayram ovqatı qatıb.  Bayram əhval-ruhiyyəli çıxışlarda Novruz baharın ilk günü, təbiətin canlanması, torpağın oyanış bayramı kimi vurğulanıb. 
Bayram şənliyində ümumtəhsil məktəblərinin, məktəbəqədər tərbiyə müəssələrinin novruzun və xalqımızın qədim milli ənənələri ilə bağlı hazırladıqları ədəbi bədii xor kompozisiyasları, şeirləri, folklar nümunələri, şagirdlərin əl işlərindən ibarət rəsm sərgiləri sakinlər tərəfindən rəğbətlə qarşılanıb. 
Bayram tədbirində qədim el adət-ənənələrimiz və Novruz rəmzləri olan səməni, müxtəlif şirniyyat nümunələri ilə bəzədilmiş bayram xonçaları və milli mətbəximizin ləziz təamları göz oxşayıb.
Şəhər rəhbəri tədbirin keçirildiyi ərazidə sakinlərlə görüşüb, onlara bayram təbriklərini çatdırıb.
Novruz şənliyi respublikanın tanınmış incəsənət ustalarının konsert proqramı ilə davam edib.
Xeberle.com