Sabah 8 Mart Beynəlxalq Qadınlar Günüdür. Beynəlxalq İşçi Qadınlar Günü olaraq da tanınan qadınların iqtisadi, ictimai və siyasi mübarizəsini, habelə ümumi olaraq onlara qarşı nəzakət, sevgi və məhəbbətin tərənnümünü ənənəvi hala gətirmiş bu bayram ölkəmizdə də hər il təntənəli şəkildə qeyd olunur. Qadınların bu bayramı sevərək qeyd etmələrinin səbəblərindən biri də bəylər, dostlar, yaxınlar tərəfindən onlara nəvaziş, diqqət göstərilməsi, hədiyyələr verilməsidir.

 

Xeberle.com olaraq bu dəfə şəhərimizin ziyalı, tanınmış qadınları arasında sorğu keçirərək onlara 8 Mart Beynəlxalq Qadınlar Günündə bu vaxta qədər verilən ən özəl hədiyyənin və bu gündən gözləntilərinin nələr olduğunu öyrənməyə çalışdıq.

 

 

 

Aidə Eyvazlı, jurnalist: "Bilirsiniz, hədiyyənin nədən ibarət olması, dəyəri önəmli deyil, hər şey onun verən insanın şəxsiyyətindən, səmimiyyətindən asılıdır. Ümumiyyətlə hədiyyə sevən biri deyiləm, əksinə mənə hədiyyə veriləndə utanır, sıxılıram, istəmirəm ki, kiməsə borclu olum. Bəlkə də elə bu xüsusiyyətimi bildikləri üçün mənə çox hədiyyə edənlər olmayıb. Mənə ən bahalı hədiyyəni ötən il Azərbaycan Milli Mətbuat günündə hörmətli prezidentimiz İlham Əliyev etdi, jurnalistlər binasında mənim də mənzilim oldu.Əslində 8 mart bayramında  2015-ci ildən sonra hədiyyə istəmirəm. Çünki 7 mart 2015-ci ildə anamı itirmişəm. O gündən sonra bu bayram mənim üçün anasızlığımın ötən illəridir".

 

İndira Şəmsivari, Sumqayıt şəhər Maliyyə İdarəsində 2-ci dərəcəli dövlət qulluqçusu : " 8 martda mənim üçün ən gözəl hədiyyə nəvəmdən gəlib. Noyabr ayında dünyaya gələn nəvəmin əlinin qələmlə çəkilmiş şəklini açıqcanın içərisində onun əli ilə mənə hədiyyə etmişdilər. Mən qələmlə çəkilmiş həmin barmaqları bir-bir öpdüm və ağladım, Tanrıma mənə nənəlik taxt-tacını bəxş etdiyi üçün minnətdarlığımı bildirdim".

 

 

Ofelya Babayeva, şairə: "Çox xoşladığım üçün mənə həmişə çiçək hədiyyə olunub. Bir də Təhsil Nazirliyi və İcra Hakimiyyətinin təxminən 15 il bundan əvvəl hədiyyə etdikləri "Fəxri Fərman"lar və çiçəklər mənim üçün maraqlı hədiyyələrdən idi. Bu il elə bir ciddi şey gözləmirəm".

 

 

 

 

Mətanət Pirquliyeva, Sumqayıt Dövlət Texniki Kollecinin direktoru: "Düzünü desəm, mənə 8 mart Beynəlxalq Qadınlar Bayramında heyrətləndirən bir hədiyyə verilməyib. Mənim üçün bu il ən böyük hədiyyə övladlarımın və ya işlədiyim müəssisədəki işçilərdən hər hansı birinin uğuru olardı".

 

 

 

 

Mətanət Məhərrəmova, Qızıl Aypara Cəmiyyətinin Sumqayıt bölməsinin rəhbəri: " Mənim üçün hədiyyənin böyüyü-kiçiyi yoxdur. Ən böyük hədiyyənin diqqət olduğunu düşünürəm. Şəhər rəhbərliyi çox sağ olsun ki, hər il qadınlar üçün 8 mart günü tədbir keçirir və bizə hədiyyələr təqdim edir. Bizim də o tədbirə dəvət olunmağımız böyük bir diqqətdir".

 

 

 

 

 

Ayət Kərimova, Sumqayıt şəhər İnteqrasiya Təlimli İnternat Tipli Gimnaziyanın direktoru: "Mənim üçün ən özəl hədiyyə şagirdlərimin təbriki olub. Bilirsiniz ki, bizim kontingent sağlamlıq imkanları məhdud olan uşaqlardan ibarətdir. Onların məni şeir və nəvazişlə təbrik etmələri mənim üçün ən böyük hədiyyədir. Bu il mən istərdim ki, bütün uşaqlar sağlam olsunlar, dünyada heç bir xəstə uşaq qalmasın. Çünki xəstə uşaq valideyn üçün əzab, göz yaşı deməkdir. Mən hər gün həmin valideynlərin göz yaşlarını görürəm və özüm də əzab çəkirəm".

 

 

 

 

 

 

Günel Eyvazlı, şairə: "Mən hədiyyə verməyi daha çox xoşlayıram. Ən özəl hədiyyələri də həmişə doğmalarımdan almışam. Məsələn, atamın mənə hədiyyə etdiyi saatı indiyə qədər taxıram. O mənim üçün gözlənilməz, özəl və sevimli bir hədiyyə olmuşdu. Daha sonra dostlarım tərəfindən hədiyyə olunan kitablarım var ki, onları indi də saxlayıram və hələ də sevə-sevə oxuyuram. Bu il mənim heç kimdən gözləntim yoxdur. Həyatı rahat yaşamağı sevən biri olduğum üçün özümü əlavə düşüncələrlə yükləməyi xoşlamıram".

 

Elnarə Salamova

Xeberle.com

Xəbərdən istifadə edərkən istinad etmək vacibdir.