Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumov Xeberle.com-a açıqlamasında bildirib ki, 2018-ci ilin ötən dövrü ərzində avtobus sürücülərinin işdən çıxarılması hallarına da rast gəlinib: "Bu ilin ötən dövrü ərzində qayda pozan, nizam-intizama əməl etməyən 10-a yaxın sürücü işdən uzaqlaşdırılıb".

T. Saydumov avtobus sürücülərinin işə qəbul qaydalarını da açıqlayıb: "İşə qəbul zamanı ilkin şərt sürücünün yaşıdır ki, bu da 25- 55 yaş arası olmalıdır. D  kateqoriyası ilə ən az 3 il sürücülük təcrübəsi olan sürücülərlə müqavilə bağlanılaraq işə qəbul edilir. İşə qəbul zamanı nəqliyyat vasitəsi müqavilə əsasında birbaşa sürücünün özünə təhvil verilir. Məqsəd sərnişindaşımada nizam-intizamın gücləndirilməsi, yol-nəqliyyat hadisələrinin sayının azaldılmasıdır. Çünki nəqliyyat vasitəsinə cavabdehlik sürücülərin öz üzərində olarsa, məsuliyyətli olmağa məcburdurlar".

Qurum rəsmisi həmçinin onu da deyib ki, iş üçün müraciət edən şəxs kimliyindən asılı olmayaraq sağlamlıq haqqında və Narkoloji Dispanserdən arayış təqdim etməlidir: "İşə qəbul edildikdən sonra isə nizam-intizam qaydalarına riayət etməyən, işinə məsuliyyətsiz yanaşan sürücülərə müdiriyyət tərəfindən ciddi xəbardarlıq edilir, töhmət verilir, bütün bunlara məhəl qoymayanlar isə işdən azad edilir".