"1991-ci ildə Azərbaycan Dövlət Təhlükəsizlik Komitəsinin sədri V.Hüseynov mənə belə bir tapşırıq verdi ki, Stavropolda xüsusi qrup formalaşıb, Azərbaycana qarşı təxribat törətmək istəyirlər. Mən orada xeyli işləməli oldum. Yerli kəşfiyyatın əməkdaşları ilə əlaqə saxladım. Bizə məlum oldu ki, 7 nəfər erməni millətindən olan ekstremist qrup Sumqayıtda "Ximprom”un (kimya istehsalat birliyi) xlor sexini partlatmaq istəyirlər. Xaricdə yaşayan erməni lobbisi onlara külli miqdarda pul və böyük partlayışa səbəb olacaq tratil ayırmışdılar".
Bu sözləri 2019-cu ildə Xeberle.com-a eksklüziv açıqlama verərkən 1988-1993-cü illərdə Azərbaycan Dövlət Təhlükəsizlik Komitəsinin Sumqayıt şəhər şöbəsinin rəisi işləmiş Vladimir Lebedev deyib.
Onun sözlərinə görə, planlaşdırılan partlayışın qarşısını almağa müvəffəq olublar: "Onlardan birini satın ala bildik. Əvvəlcə hər şeyi boynundan atdı. Biz ona erməni lobbisi tərəfindən verilən puldan daha böyük məbləğdə pul verdik. O, tamahkar olduğundan şirnikləndi və bizimlə işləməyə razılıq verdi. Bizi axşamüstü bir yaşayış məntəqəsinə apardı. Burada Sumqayıtın, "Ximprom”un, sexlərə giriş-çıxış yolları haqqında xəritələr vardı. Nə vaxt və necə Azərbaycana gələcəklərini də bizə söylədi. Onlara azərbaycanlı familiyası ilə bağlı pasport hazırlamışdılar. Biz bütün bunlar haqqında Moskvaya SSRİ Dövlət Təhlükəsizlik Komitəsinə məlumat verdik. Onlar da həmin şəxslərin həbsi haqqında bizə göstəriş verdilər. Əməliyyatımızı uğurla başa vurub, onların hamısını həbs etdik. Bir çox faktlar da aşkara çıxdı".
Xəbərdən istifadə edərkən istinad etmək vacibdir.
