Avtobuslar üçün ayrılmış həmin zolaqlara keçən digər nəqliyyat vasitələri yol polisi tərəfindən cərimələnəcək.

Sumqayıt şəhər Polis İdarəsinin Dövlət Yol Polisi Şöbəsinin rəisi Şamxal Əliyev Xeberle.com-a bildirib ki, işlər tam başa çatmadığı üçün sürücülərə yalnız xəbərdarlıqlar olunur. Sonrakı mərhələdə isə nişanlanma xəttinin tələblərini pozanlar cərimələnəcək: "Nişanlama xəttinin tələbi olaraq 40 manat məbləğində cərimə tətbiq olunacaq. Həmin xəttə girmə elə xəttin tələbini pozmaq deməkdir. Sürücülər üçün xətdə saxlamaqla, xəttə girmək eyni məsuliyyətdir. İş tam başa çatmadığı üçün hələ ki, sürücülərə xəbərdarlıqlar edilir. Sülh küçəsinin Heydər Əliyev prospekti ilə kəsişən hissəsindən Koroğlu prospekti istiqamətində nişanlama bu gün aparılacaq.

Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumov isə Xeberle.com-a açıqlamasında deyib ki, müntəzəm sərnişindaşımanı həyata keçirən avtobuslar üçün ayrıca zolaqların yaradılması yollarda avtomobillərin hərəkətini xeyli yüngülləşdirəcək: "Tıxacların qarşının alınması məqsədi ilə sağ və sol yollarda birinci hissə avtobuslar üçün ayrılıb. Hələ ki, Sülh prospektində salınan bu zolaqlar gələcəkdə bütün şəhər yollarında salına bilər. Məqsəd sərnişinlərin və avtobusların hərəkətlərinin rahatlığını təmin etməkdir.

Xədicə Səxavətqızı

Xeberle.com