Bu sözləri Xeberle.com-a açıqlamasında "Azəristiliktəchizat" ASC-nin "Sumqayıtistiliktəchizat" İdarəsinin abonent və müştəri xidmətləri üzrə iqtisadçı Binəli Əliyev deyib.

Qurum rəsmisi bildirib ki, ən çox istiliklə təchiz olunan bina sayı 17-ci mikrorayondadır və bu ərazidə 3 qazanxana işlək vəziyyətdədir: "59 yaşayış binasının 32562 mənzili istilklə təmin edilir. Bu mikrorayonda istilikdən istifadə edən 2690 abonentin 52 min 962 manat 13 qəpik borcu var".

B. Əliyev idarə tərəfindən istiliklə təchiz edilən və borclu olan digər əraziləri də açıqlayıb: "Borclarını vaxtında ödəməyən ərazilərdən də biri də 5-ci mikrorayondur. Belə ki, 2120 abonentindən 1541-i istilikdən istifadə edir, onların da ümumi olaraq 43 min 886 manat 29 qəpik borcu var. 12-ci mikrorayonda yerləşən əlillər binasının isə 132 abonentindən 130-u istilikdən istifadə edir və 15 min 448 manat 54 qəpik borcları var ki, bunun da 80 faizi istifadə etdikləri isti suya görədir".

O, qeyd edib ki, binaların istilklə təchiz edilməsi işi Mənzil İstismar Sahələrinin tabeliyində olduğu üçün onlar yalnız istilik xətlərini binaların girişinə qədər gətirə bilirlər: "İstilik xətləri mənzillərdən keçdiyi üçün yaşayış ünvanlarına giriş bizim səlahiyyətlərimiz çərçivəsində olmadığından, binanın daxilində olan işlər artıq abonentlerin öz öhdəliyinə verilir. Və ödəniş vaxtında edilmədikdə isə ümumi binaya gələn istilik xəttini bağlamaq məcburiyyətində qalırıq. Nəzərə alsaq ki, hazırda kommunal xidmətlər arasında ən ucuz olan istilik təminatıdır ki, bir kub metr istilik vətəndaşa 15 qəpikdən satılır. İstiliyi əhaliyə vaxtında poblemsiz çatdırmaq üçün biz də öz növbəmizdə qaza və suya olan borclarımızı vaxtında ödəməliyik. Lakin abonentlər bəzən ödənişləri vaxtında etməməklə işlərimizi çətinə salırlar".

Xədicə Səxavətqızı

Xeberle.com