Artıq Yeni ilin gəlişinə sayılı saatlar qalıb. Hər kəs bayramı bir qayda olaraq, müxtəlif yerlərdə, fərqli mühitdə keçirməyə çalışır. Kimisi bayramı evində, ailəsi və qohumları ilə birgə keçirir, kimisi isə Yeni ili qeyd etmək üçün xaricə üz tutur. Bir sözlə, hamının bayram ilə bağlı müxtəlif planları var.
Bəs Sumqayıtın məmurları yeni ili harada keçirəcək?
Xeberle.com-un "Yeni ili harda qeyd edəcəksiniz və 2019-cu il sizin üçün hansı hadisə ilə yadda qaldı?” sualına məmurlarımız maraqlı cavablar veriblər. Sorğumuzun cavablarını olduğu kimi təqdim edirik:
Sumqayıt şəhər Təhsil Şöbəsinin müdiri Arzu Alızadə: "Bu il "Sumqayıtın Tarixi və bu günü məktəblilərin gözü ilə” adlı Sumqayıt təhsili barədə kitab nəşr olundu. Konfrans keçirildi və həmin konfransın yekunu olaraq nəşr olunan bu kitab mənim üçün 2019-cu ildə ən yaddaqalan hadisələrindən oldu. Həmçinin də Təhsil Nazirliyində ölkə üzrə nəticələr müzakirə olunarkən Sumqayıt təhsilinin bütün nominansiyalar üzrə birinci pillədə olması mənim üçün yaddaqalan oldu, hər dəfə monitorlarda şəhərimizin adını ilk pillədə görəndə çox qürur duydum. Yeni ili ailəmlə birgə öz evimdə, doğma Sumqayıtda qeyd edəcəm”.
Sumqayıt şəhər Səhiyyə Şöbəsinin müdiri Səkinə Sadıxova: ” 21 ildir ki, səhiyyə sahəsində fəaliyyət göstərirəm, məhz 2019-cu ildə səhiyyə şöbəsinin müdiri vəzifəsinə təsdiq olunmağım mənim üçün unudulmaz olacaq. Tam səmimi deyirəm, bayramı ailəmlə birgə evimdə qeyd edəcəyəm. Bayram günlərində qohum-əqrəbaların da ziyarəti gözlənilən haldır”.
Sumqayıt Şəhər İstilik Təsərrüfatı İdarəsinin müdiri Aftandil Nuriyev: ”Yeni ili evimdə, ailəmlə birgə qeyd edəcəyəm. Dünyanın harasında olsam da, Yeni il axşamı mütləq ailəmin yanında oluram və bayramı onlarla qeyd edirəm. 2019-cu il mənə doğma şəhərimin 70 illik yubileyinin qeyd edilməsi ilə yadda qaldı. Sumqayıt başdan başa bəzənmişdi, indi də bu bayram ab-havası qalmaqdadır.”
Sumqayıt Avtomobil Nəqliyyatı ilə Sərnişindaşıma İdarəsinin rəisi Tofiq Saydumov: "2019-cu ili yalnız bəlasız, xalqa xidmət etməklə yola salıram. 2020-ci ildə də çalışacağam ki, heç bir qəza, qayda pozuntusu, sürücü mədəniyyətsizliyi kimi xoşagəlməz hadisələr olmasın. Mən bayram günlərini də iş başında olacağam. Növbədə olan sürücülərə nəzrəti şəxsən özüm və komandam həyata keçirəcəyik ki, soydaşlarımız bayram günlərində ictimai nəqliyyatdan rahatlıqla istifadə edə bilsinlər”.
Sumqayıt Regional Mədəniyyət İdarəsinin rəisi Mehman Şükürov: "Mədəniyyət işçisi olaraq 2019-cu ildə doğma Sumqayıtımızda "Muğam Mərkəzi”nin və illər sonra kinoteatr binasının yenidən tikilərək istifadəyə verilməsi mənim üçün ən yaddaqalan hadisələrdən oldu. Bayramı hər il bir qohum-qardaşın evində yığışaraq qeyd edirik. Hələlik dəqiq olaraq harda keçirəcəyimizi planlaşdırmamışıq. Ailə fərdləri ilə bir yerə yığışırıq, daha geniş həcmdə toplanırıq...”
Sumqayıt Şəhər "Lift-Servis” Birliyinin rəisi Cümşüd İsmiyev: "Xidmət sahəmizdə 2019-cu il üçün ən böyük uğurumuz - intellektual idarəetmə sisteminə keçməyimizdir. Onlayn idarəetmə nəticəsində xidmət səviyyəmizin keyfiyyəti yüksəlib və nəzarət mexanizmi də asanlaşıb. 24 saat müddətində dispetçer xidmətimiz fəaliyyətdədir və bu, əhaliyə xidmət keyfiyyətinin artması deməkdir. Bayramı ailəmlə birgə qeyd etdikdən sonra tətil günlərində gəzintilər də planlaşdırıram. İl boyu fasiləsiz, istirahətsiz işlədiyimdən qısa tətilə ehtiyacım var”.
Xədicə Səxavətqızı
Xeberle.com
Xəbərdən istifadə edərkən istinad etmək vacibdir.
