Xeberle.com-a müraciət edən E.Hacıyev Hacı Zeynalabdin Bələdiyyəsindən əməkhaqqını ala bilmədiyini deyir: "15 ildən artıq Sumqayıt şəhəri Hacı Zeynalabdin Bələdiyyəsində ümumi şöbənin mütəxəssisi vəzifəsində çalışmışam. 3 seçilmiş sədrlə işləmişəm. İşimdə həmişə nizam-intizamlı, verilən tapşırıqları layiqincə yerinə yetirən insanam. Necə deyərlər, başımı aşağı salıb ailəm üçün "çörək pulu" qazanmışam".

E.Hacıyev bu ilin yanvar ayının 14-də öz ərizəsi ilə işdən çıxdığını və 3 aylıq əmək haqqını hələ də ala bilmədiyini bildirib: "2019-cu ilin 3 aylıq (oktyabr, noyabr, dekabr), bu ilin yanvar ayından 14 gün əmək haqqımı və 2 illik (2018-2019-cu illər) əmək məzuniyyətimi hələ də ala bilməmişəm. Bu barədə hazırkı bələdiyyə sədrinə yazılı müraciət etsəm də, məsələ bu günə qədər öz həllini tapmamış qalır. Üstəlik yeni  bələdiyyə sədri Əsli Qasımova mənə kobud cavab verərək Hacı Zeynalabdin qəsəbəsi üzrə icra nümayəndəsi Lalə Hacıyevanın onun arxasında dayandığını deyir. Onlardan tələb edirəm ki, mənim halal əmək haqqımı versinlər".

Xeberle.com olaraq qarşı tərəfin də mövqeyini öyrəndik. Hacı Zeynalabdin Bələdiyyəsinin sədri Əsli Qasımova Elton Hacıyevin öz ərizəsi ilə işdən azad olunduğunu və 3 aylıq əmək haqqının isə ondan əvvəlki sədr Elşən Məmmədovun dövründən qaldığını bildirdi. Ə.Qasımova məsələyə belə aydınlıq gətirdi: "Bələdiyyədən aylarla əmək haqlarını ala bilməyən yalnız Elton Hacıyev deyil, həmçinin ondan öncəki sədrin dövründən yığılıb qalmış vergi borcları da var. Yığımlar əsasında hissə-hissə bütün borclar ödənilir. E. Hacıyevə də rəsmi olaraq cavab verilib ki, maliyyə vəsaiti olan kimi ilkin olaraq onun aylıq məvacibi ödəniləcək. O ki qaldı vətəndaşı təhqir etməyimə, mən heç vaxt onunla dialoqda olmamışam. Mənim vətəndaşla heç bir ədavətim yoxdur və yaxın zamanlarda da bələdiyyənin ona olan borcu ödəniləcək.”