Redaksiyamıza daxil olan şikayətdə "Azərişıq" ASC-nin Sumqayıt şəhər şöbəsinin əməkdaşları tərəfindən şəhər üzrə borcu olan vətəndaşların işığının xəbərdarlıq edilmədən kəsildiyi bildirilir.
Məktubda həmçinin qeyd olunur ki, borc məbləğinin fərqi yoxdur. "Fərq etməz, 5 manat borcu var, ya 500 manat, vətəndaş hissə-hissə ödəyir, ya aylarla ödəmir. Hamısını kəsirlər. Başa düşürəm, işıq işlənirsə borcu da ödənməlidir. Amma insanları da başa düşmək lazımdır. Pandemiyaya görə aylardı insanlar işləmir, pul qazanmır bunu niyə başa düşən yoxdur? Azərişıq ASC-nin Sumqayıt şəhər şöbəsinin rəhbərliyi başqa planetdən gəlib görəsən? 1 ildə mən o müdiri yerində tapa bilməmişəm. Qapısına nə iş saatı yazılıb, nə də qəbul günləri. Adam ancaq qeybə çəkilib qanunsuz göstərişlər verir. Qanunsuz nəyə görə deyirəm? Vətəndaşa xəbərdarlıq edilmədən işığı kəsilir. Yarım saat bundan qabaq işığı kəsən yerdə tutdum. Deyirəm niyə kəsirsiniz, deyir ki, borcun var. Deyirəm niyə qapını döyüb demirsiniz, deyir ki, indi çıxıb deyəcəkdik. Deyirəm, qardaş, ayıbdır, gəlib gizlin-gizlin işıq kəsirsiniz, camaatın evdə körpəsi, xəstəsi var. Heç olmasa qapını döy, xəbərdarlıq elə, bildiriş ver. Deyir, neyləyək, bizə də göstəriş verilib. Mən onları da qınamıram. Göstəriş verən verir, özü də qaçıb gizlənir. Camaatı qoyur üz-üzə. İnsanların vəziyyətini, yaşayışını başa düşən yoxdur. Şəxsən mənim 70 manata yaxın borcum var danmıram. Mart ayında iki dəfə bundan çox idi. Baxmayaraq ki, pandemiya dövrü idi vəziyyət çətin idi amma imkan daxilində hər ay ödəniş edib xeyli hissəni ödəmişəm. Bundan sonra da edib 2 aya borcu bağlayacam. Çünki tək işıq deyil. Qaz var, su var, bank var, MİS var, lift var, bələdiyyə var, telefon var, internet var, bir sözlə, türklər deməli, var oğlu var. Mən 500 manat jurnalist maaşı ilə bütün borcları eyni anda ödəyə bilmərəm, bunu dövlətin bəzi məmurları niyə başa düşmür?! Aylarla 1 qəpik ödəməyənlə imkan daxilində hissə-hissə ödəyənləri də eyni tərəzinin gözünə qoymaq olmaz axı! Efirlərdə ağ yalan danışırsınız ki, biz heç bir əməkdaşımımıza elə göstəriş verməmişik. Verirsiniz axı. Azərişıq hətta sərt karantin dövründə belə əməkdaşlarının əlinə siyahı verib göndərirdi vətəndaşların işığını kəsməyə. Vecinə deyildi o vətəndaş işləyir, ya işləmir. Pulu var, ya yoxdu. Yeməyə çörək tapır, ya tapmır. Efirdə başqa söz deyib, əməldə başqa iş görürsünüz, demək istədiyim budur", - deyə məktubda yazılır.
Azərişıq ASC-nin Sumqayıt şəhər şöbəsindən Xeberle.com-a mövcud problem haqqında verilən açıqlamada qeyd olunub ki, vaxtlı-vaxtında işlətdiyi enerjinin pulunu ödəyən abonentlərin işığı qısa müddətli gecikmələrə görə kəsilmir. "Aylarla işıq pulunu ödəməyənlərə öncə xəbərdarlıq edilir, daha sonra enerjidən istifadə etmələrinə məhdudiyyət qoyulur. Böyük məbləğdə borcu olan abonentlər isə idarəyə dəvət olunur, borcunun müəyyən məbləğini ilkin olaraq ödəniş edərək müqavilə imzalayır və borcunu aylara bölərək ödəyir. Hər bir abonent birmənalı olaraq işlətdiyi enerjinin pulunu ödəməlidir", - deyə idarədən bildirilib.
Xədicə Səxavətqızı
Xəbərdən istifadə edərkən istinad etmək vacibdir.
