"Sumqayıt şəhərində şəhid guşəsində Azərbaycan və Türkiyə bayraqlarının Sumqayıt şəhər İcra Hakimiyyətinin nümayəndələri tərəfindən endirilməsi barədə sosial şəbəkələrdə yayılan məlumatlar həqiqəti əks etdirmir”.

Bu barədə Sumqayıt şəhər İcra Hakimiyyətindən Xeberle.com-a verilən açıqlamada bildirilir. Açıqlamada qeyd olunur ki, şəhər icra hakimiyyəti tərəfindən belə bir tapşırıq verilməyib: "Videoda əks olunan görüntünün araşdırılması zamanı məlum olub ki, ərazidə yaşayan vətəndaş tərəfindən bayrağın səliqəyə salınması istəyini başqa bir vətəndaş yanlış anlayıb və buna etirazını bildirib. Bu gün də həmin guşə və bayraqlar yerindədir. Azərbaycan bayrağı hər birimizin qürur, fəxarət mənbəyidir, o cümlədən qardaş Türkiyə bayrağı hər bir azərbaycanlı üçün eyni dəyəri ifadə edir".

Qeyd edək ki, Sumqayıt şəhər İcra Hakimiyyətindən gələn bir qrup şəxsin 12-ci mikrorayonda sakinlər tərəfindən şəhidlərimizin xatirəsinə ucaldılmış "Şəhidlər” lövhəsində olan Türkiyə bayrağını endirməyə cəhd göstərdiyi iddia edilir. Görüntüdə Sumqayıt şəhər İcra hakimiyyəti başçısının 3 nömrəli sahə inzibati ərazi dairəsi üzrə nümayəndəliyinin icra nümayəndəsi Araz Fərhadov da yer alıb.

Lakin, orada yaşayan sakinlərdən birinin etirazından sonra bayrağı yenidən qaldırıb, ərazini tərk ediblər.