Sumqayıt şəhər 3 saylı poliklinikada tibbi maskadan istifadə etməyən qeydiyyatçı işdən azad olunub.  Bu barədə Xeberle.com-un sorğusuna cavab olaraq Tibbi Ərazi Bölmələrini İdarəetmə Birliyindən (TƏBİB) bildirilib.  Məlumatda qeyd edilib ki, videomaterialda qeyd olunan məsələ qurum tərəfindən araşdırılıb:   "Araşdırma nəticəsində maska taxmaqla bağlı qaydaya riayət etmədiyi aşkar olunan qeydiyyatçı töhmət verilərək işdən azad edilib. Digər şəxs isə maska taxmadığı üçün cərimələnib”.  "Bir daha bildiririk, pandemiya ilə mübarizə tədbirləri çərçivəsində özümüzü və ətrafımızı qorumağımız üçün verilən qərarlara riayət etmək hər birimizin borcudur, sosial məsuliyyətini nümayiş edən vətəndaşa isə təşəkkür edirik”, - deyə, TƏBİB-dən qeyd edilib. 

 xxx

Xeberle.com-unəldə etdiyi məlumata görə, 1 nömrəli şəhər xəstəxanasının poliklinika şöbəsində (3 saylı şəhər poliklinkası) növbədə dayanan şəxslər işçinin maska taxmamasına irad bildirib. Nəticədə tibb ocağının əməkdaşı ilə aralarında gərgin anlar yaşanıb.

Sözügedən qurumun tibbi maska istifadə etməyən hər iki işçisi Sumqayıt polisi tərəfindən inzibati məsuliyyətə cəlb olunub və qanunvericiliyin müvafiq tələblərinə əsasən cərimələniblər.

Bununla yanaşı, hər iki tibb işçisinə töhmət verilib.

Qeyd edək ki, poliklinika şöbəsinin baş həkimi Arzu Bəndəliyevadır.

Xədicə Səxavətqızı

Xeberle.com