Sakinlər Xeberle.com-un redaksiyasına şikayət məktubu yazaraq bildiriblər ki, illərdir binanın qəzalı vəziyyətdə olmasına baxmayaraq indiyədək heç bir ciddi tədbir görülməyib. Müəyyən müddət əvvəl binanın özülündə bərkitmə işləri aparılıb, lakin artıq binanın sol tərəfində bloklarda və mənzillərdə gözlə görüləcək böyüklükdə çatlar əmələ gəlib. Mənzillərdə çöl qapılar uzun müddətdir çətinliklə örtülüb açılır: "Artıq otaqların qapılarında da belə vəziyyət yaranıb. Şikayət edəndə də gəlib baxılır, deyilir qəzalı deyil bina”.

Sumqayıt Mənzil Kommunal Təsərrüfatı İstehsalat Birliyinin baş mühəndisi Rövşən Fərəcov Xeberle.com-a açıqlamasında binaya mütəxəssislərin iştirakı ilə baxış keçiriləcəyini söyləyib: "Mühəndislər tərəfindən binanın çatlar olan yerlərinə mayak qurulacaq, 10 gün nəzarətdə saxlanılacaq. İcra hakimiyyətinin əməkdaşları və Fövqaladə Hallar Komissiyasına da məlumat verilib. FHN və Dövlət Baş Layihə İnsitutuna binaya baxış keçirərək rəy vermələri üçün rəsmi məktubla müraciət olunacaq. Həmin rəyə uyğun olaraq lazım olan işlər görüləcək”.