Topaz Premyer Liqasının ikinci yarısına Türkiyədə hazırlaşmaq qərarı verən "Sumqayıt” maraqlı addım atıb. Apasport.az-ın futbolinfo.az saytına istinadən xəbərinə görə, klub rəhbərliyi çoxbilmişlik etmək qərarına gəlib.

Hazırkı maliyyə çətinliyi dövründə bir çox klublarımızın vətəndə qalmağa üstünlük verməsi başadüşüləndi. Bir çox komandamızın yaşamaq uğrunda mübarizə apardığı bir vaxtda 40-50 min dollara qənaət etməsi normaldı. İş ondadı ki, "Sumqayıt” rəhbərliyi həm komandanı Antalyaya aparmağı, həm də pul xərcləməməyi planlaşdırır.

Məlumata görə, prezident Kamran Quliyev Türkiyəyə gedib-qayıtmaq üçün lazım olan yol xərclərini futbolçuların "belinə yükləyib”. Komandanın bütün üzvləri Antalyada toplanış keçmək üçün özünə bilet almalıdı. Klub bununla öz xərclərini azaltmaq niyyətindədi.

Futbolçular durumdan narazı olsa da səslərini çıxara bilmirlər. Ancaq bəzi oyunçular rəhbərliyə etirazını bildirib. Onlar bilet almaq istəmədiklərinin deyib. Kamran Quliyev müxtəlif təzyiq vasitələri ilə onları istəyinə tabe etdirmək istəyir. Maaşdan pul tutmaq, cərimələmək, komandadan qovmaq kimi üsullarla hədə-qorxu gələn prezidentin istəyinə çatıb-çatmayacağı tezliklə bəlli olacaq.

"Sumqayıt”ın mətbuat xidmətinin rəhbəri Rəşad Məmmədovla əlaqə saxladıqda, klub sözçüsü məlumatı təsdiqlədi:

"Dekabrda qış hazırlıqlarının Sumqayıtda keçirilməsi barədə məşqçi heyətinə məlumat verilmişdi. Ardından futbolçu heyəti klub rəhbərliyinə müraciət edərək ölkə xaricində hazırlıq prosesi keçirilməsi üçün araşdırma aparmağı xahiş etdi. Araşdırılmalardan sonra təlim-məşq toplanışı üçün Antalya bölgəsində uyğun variant tapıldı.

Mövsümün əvvəlində qış hazırlıq mərhələsi üçün nəzərdə tutulmuş büdcə xərcləri ölkə xaricində təlim-məşq toplanışı və nəqliyyat xərclərini əhatə etməməsi isə iqtisadiyyatımızda manatın devalvasiyası ilə bağlıdır.

Nəticədə, futbolçu heyəti nəqliyyat xərclərini ödəməyi öz üzərlərinə götürdü. Böhranlı vəziyyətdə futbolçu heyəti ilə rəhbərliyinin bu məsələdə anlaşması klubda vəhdət təşkil etməsi deməkdi”.