İcra başçısı yayılan xəbərləri təkzib etdi
Bir neçə gündür ki, mətbuatda Sumqayıt Şəhər İcra Hakimiyyətinin başçısı Zakir Fərəcovun Abşeron rayonunun icra başçısı olarkən istifadə etdiyi 01-AA-001 seriyalı avtomobili və nömrəni xanım icra başçısı İradə Gülməmmədovaya təhvil verməməsi barədə xəbərlər yayılmaqdadır.
Yazılanlara görə, xanım icra başçısı hazırda "002” seriyalı xidməti avtomobilindən istifadə etmək məcburiyyətində qalıb.
Sumqayıt Şəhər İcra Hakimiyyətininin və Abşeron Rayon İcra Hakimiyyətinin mətbuat xidmətlərindən verilən məlumata görə, bununla bağlı mətbuatda yazılanlar həqiqəti əks etdirmir: "Zakir Fərəcov Sumqayıt Şəhər İcra Hakimiyyətinin başçısı təyin edildikdən sonra, yəni 02 sentyabr 2015-ci il tarixdə xidməti maşınını və nömrəsini Abşeron Rayon İcra Hakimiyyətinin yeni başçısına təhvil verib. Bəzi mətbuat vasitələrində bu tip dəqiqləşdirilməmiş informasiyaların yayılması yaxşı hal deyil. Bu xəbər Sumqayıt Şəhər İcra Hakimiyyəti və Abşeron Rayon İcra Hakimiyyəti tərəfindən təkzib olunur".
Qaynar.info
Xəbərdən istifadə edərkən istinad etmək vacibdir.