2020-ci il fevralın 9-na təyin edilmiş Azərbaycan Respublikasının Milli Məclisinə seçkilərdə deputatlığa namizəd şəxlsərin təbliğat-təşviqat kampaniyası davam edir. Namizədlər görüşlərlə yanaşı sosial şəbəkə və digər online resusrlarla da təbliğat və tanıtım materiallarını yayırlar. Onlardan biri də 42 saylı Sumqayıt ikinci seçki dairəsindən mübarizəyə qoşulan gənc namizəd, Sumqayıt sakini İbrahimov Tural Həsən oğludur. Gəlin bu namizədimizi daha yaxından tanıyaq.

 

Tanıtım

Tural İbrahimov 21 yanvar 1984-cü ildə Sumqayıt şəhərində ziyalı ailəsində anadan olmuş, orta təhsilini Sumqayıt şəhəri "Təfəkkür” liseyində, Ali təhsilini Sumqayıt Dövlət Universitetində almış, ixtisasca iqtisadçı-menecerdir. 2008-2011-ci illərdə Azərbaycan Respublikası Ədliyyə Nazirliyində xidmət göstərmiş, 2012-2018-ci illər ərzində bir neçə özəl müəssisədə rəhbər vəzifələrdə çalımış, 2019-cu ildən indiyədək özəl şirkətin direktorudur. Rəhbərlik etdiyi şirkət bir neçə dövlət layihələrinin icrasında yaxından iştirak etmiş və öz töhfəsini vermişdir. Hazırda Sumqayıt şəhərində yaşayır, ailəlidir, iki övlad atasıdır.

Atası - İbrahimov Həsən İbrahim oğlu prokurorluq orqanlarının əməkdaşı olub və uzun müddət Sumqayıt şəhər prokurorluğunda xidmət göstərib, hazırda təqaüddədir, Sumqayıt şəhərinin ictimai-siyasi həyatında fəal iştirak etmiş, hazırda Sumqayıt şəhərində yaşayır.

Anası - İbrahimova İradə Məmməd qızı ali təhsillidir, Sumqayıt şəhərinin özəl və dövlət müəssisələrində mühasib vəzifəsində fəaliyyət göstərmiş, təqaüddədir, hazırda Sumqayıt şəhərində yaşayır.

Qardaşı - İbrahimov Ceyhun Həsən oğlu ali təhsillidir, uzun müddətdir Sumqayıt şəhərinin İAŞƏ sektorunda sakinlərə xidmət göstərir. Ailəlidir, iki övladı vardır, hazırda Sumqayıt şəhərində yaşayır.

Digər qardaşı - İbrahimov Altun Həsən oğlu natamam ali təhsillidir, subaydır, hazırda Sumqayıt şəhərində yaşayır.

 

Deputatlığa namizəd İbrahimov Tural Həsən oğlu seçicilərinə müraciət ünvanlayıb. Həmin müraciəti olduğu kimi təqdim edirik.

Hörmətli seçicilər,

Müstəqil və müasir Azərbaycan, hüquqi və demokratik prinsiplərə əsaslanan qüdrətli dövlət, dayanıqlı iqtisadiyyat, vətəndaş rifahı, yaşayış səviyyəsinin yüksəlməsinə nail olmaq üçün ölkənin qanunverici orqanı Milli Məclisdə Sizi təmsil etməklə, qanunların xalqımıza və dövlətçiliyimizə xidmət etməsinə daima çalışacam. Ölkəmizin inkişafına və hər bir vətəndaşın bu inkişafdan faydalanmasına yönəlmiş təkliflərlə çıxış edəcəm.

Müasir Azərbaycanın qurucusu Ümummilli liderimiz Heydər Əliyevin uğurlu siyasətini davam etdirmək və Azərbaycanın daha qüdrətli dövlətə çevrilməsinə nail olmaq üçün, bir gənc kimi öz dəstəyimi əsirgəməyəcəm.

Sumqayıt şəhər sakinlərinə yeni iş yerlərinin yaradılması, gənclərin, xüsusi ilə ali və peşə məktəb məzunlarının işlə təmin olunması, gənc ailələrə və gənc idmançılara diqqət göstərilməsi istiqamətində fəaliyyət göstərəcəm. Bunun üçün Sumqayıt şəhərində daimi qərargah yaradaraq, seçicilərlə davamlı görüşlər keçirəcəm və yeni qanun layihələrinin hazırlanması prosesində ictimai rəyin nəzərə alınmasına çalışacağam.

Mənə etimad göstərib Milli Məclisə üzv seçərsinizsə, Sumqayıt şəhər sakini olaraq problemlərimizin həllinə çalışacam, namizəd kimi platformamda qeyd olunmuş məsələlərlə kifayətlənməyəcəm və deputat səlahiyyətlərinin mənə verdiyi bütün imkanlardan doğma şəhərimizin inkişafı üçün istifadə edəcəm.

 

Xəbərdən istifadə edərkən istinad etmək vacibdir.