Bir petlənin manifesti! ( İsanın xatirəsinə ) –ANALİZ

   Əvvəlcə başlıq haqqında qısa arayış. “ Bəzən bir şeyi daha çox güc tətbiq etməklə həll edəcəyimiz düşüncəsindən uzaqlaşaraq sistemi və problemi asanlaşdıran yolları, metodları axtaracağıq. Məsələn, bəzən bir qapını açmaq üçün güc sərf edərək itələyirik, halbuki qapının açılmasını həyata keçirən petlə və mexanizmlərə diqqət yetirməklə görərik ki, qapı, sadəcə, özünə çəkilərək (və ya tərsinə) asanlıqla açılır. (C. Vəliyev. “Sistematik düşüncə tərzi”)”

İsa məhz belə bir petlə idi. Onu, o petləni bax beləcə istifadə etdilər. Onunla açdılar, bağladılar  və atdılar. Çünki bu situasiyada məhz belə bir petləyə, çılğın və gənc insana (insanlara) ehtiyac var idi. Növbəti mərhələlərə hesablanan istənilən hərəkatın,ideologiyanın ən aparıcı qüvvəsi məhz təlqinlərlə rahatca inandırıla bilən gəncdir. Bu gün o situasiyanın petləsi İsa aramızda olmadığına görə bir çox qaranlıq məqamları da özü ilə apardı. Onunla açılıb-bağlanan nə vardısa, hamısı da özü ilə getdi. Dolayısıyla petlə qırıldı! Onu bilərəkdən qırdılar!

Ümumiyyətlə, böyük oyunlar zamanla belə kiçik qurbanları yeyir və məhv edir. Necə ki bu oyunun ilk qurbanı sənin, mənim, bizim cəmiyyətimizin bir nümayəndəsi olan İsa oldu. Ancaq hədəf o deyil, onun fonunda olan onlarla gənc və onların da fonunda bütün gənclikdir. Təbii ki, bu qurbanların hamısını ölüm gözləməsə də, onlar ruhən ölümə məhkum olunmağa hesablanmışlardır.  Elə isə İsanı kim qurban etdi?!

İsanı tanıyan dostlar onun doğuşdan deyil, yetkin yaşlarından, universitet illərindən homoseksual olduğunu deyirlər. Bu isə vəziyyəti “Allah belə yaradıb” deyib bunu xəstəliklə əlaqələndirənlərə ən böyük cavabdır. Oyunu başdan hesablayanlar mövzunu bir az daha duyğusallaşdırmaq üçün hətta İsanın özünün əlində “Allah hər kəsi yaratdığı kimi sevir” sloqanlı tablo ilə fotosunu da çəkdirmişdilər. Zahirən təsirli və bir az da məntiqli görünən bu söz isə, bəlkə də, çoxlarının ona, onun o həyatı yaşamasına bəraət qazandırmasına səbəb olmuşdu. Hadisədən sonra mövzu ilə əlaqədar  şəxsən düz üç nüfuzlu din xadiminə müraciət etdim. Hər üçündən əvvəlcə “Allah o gənci bağışlasın” sözünü eşitdim və durumun izahını öyrəndim. Sən demə, bu mövzuda ən radikal tərəf kimi dayanan din də, əslində, bu problem bir xəstəlik kimi doğuşdan mövcud olarsa (hormon dəyişkənliyi), hətta cinsiyyətin dəyişdirilməsinə belə icazə verir. Ancaq yetkin yaşlarından insanın hər hansı təlqinlərdən dolayı bu həyatı seçməsi dində də birmənalı olaraq yolverilməzdir. (Təfərrüata varmıram, həmin din xadimləri bunun ictimai fəsadları barədə geniş danışdılar). Diqqəti yenə mərhumun üzərinə yönəldək. Tanıyanlar deyir ki, İsa homoseksual olandan sonra dini dəfələrlə təhqir etmiş, Allahı söymüşdü və bu davamlı olaraq baş verirdi. Hətta o və onun dostları bunu toplu şəkildə də həyata keçirirdilər. Sual yaranır ki, məgər bütün homoseksuallar ateistdirmi? Təbii ki yox. Bəs elə isə niyə o homoseksual olmaqla bərabər, həm də qısa zaman kəsiyində ateist oldu? Bununla da yetinməyərək bütün mental dəyərlər sisteminə düşmən kəsildi?… Sizcə, bütün bunlar, onun fiziki və zehni oriyentasiyası hansısa qüvvələr tərəfindən təlqinlə reallaşa bilərdimi? Ölkədə bəzi birliklər və onun üzvləri tərəfindən bu və ya digər formada qrup sekslərin təşkili göydənmi düşdü anidən? Bəli, bəli, düz eşitdiniz, qrup seksləri. Bəs niyə indiyə qədər Azərbaycanda məhz bu fakt bir dəfə də olsun qeydə alınmamışdı və birdən-birə belə şeylər müşahidə olunmağa başladı. Niyə bu günə qədər barmaqla göstərilən homoseksuallar son illərdə sürətlə artdı? Niyə son zamanlar dəyərlər sisteminə, dinə, əxlaqa, mentallığa qarşı belə sərt mövqedə dayanan insanlar yetişdi? Məşhur bir hind atalar sözü var ki, öskürməsən, buğ çıxmaz. Əgər bu hind atalarına inansaq, o zaman belə nəticəyə gələ bilərik ki, işin arxasında başqa məsələlər dayanır və İsa burada, sadəcə, bilərəkdən güdaza verilən qurbandır. Onun niyə intihar etdiyi məlum deyil. Bütün qınaqları gözə alıb bu həyatı yaşayan biri necə ola bilərdi ki, guya hansısa mental dəyərin təsirinə görə özünü asmış olsun?!

  İstənilən bir oyunda üst qurum fiqurlar lazım gəldikdə alt qurumdan istənilən fiquru rahatlıqla qurban verir. Hətta bunu sevərək və planlayaraq edir. Çünki öz prinsiplərinə görə verdiyi qurbanın arxasında daha böyük qazancları var. Bu qurban onlara bir çox məsələlər üçün tramplin rolunu oynayır. Bir nüansa diqqət edək. Günlər öncə bir zamanlar həyatını, sağlamlığını qurban verərək qazi olan Qarabağ döyüşçüsünün intiharı, dalını verərək rahat həyat yaşayan bir homoseksualın ölümü qədər mətbuatda şok yaratmadı və qabardılmadı. Ancaq İsanın ölümündən dərhal sonra isə onun haqqında “İsanın əzabları” adlı yazı dərc olundu. (Sosial şəbəkədə bir nəfər istifadəçi də “İsanın krasovkaları” adlı esse yazacağını elan etmişdi) Ardınca da gün ərzində sosial şəbəkələrdə xüsusilə bəzi ideologiyaya xidmət edən adamlar tərəfindən danışıldı, qabardıldı və baiskar kimi də bu cəmiyyət və onun dəyərlər sistemi göstərildi. Bəziləri bu günü, “22 yanvarı faciə günü kimi qeyd edək” təklifini verdi. Sabahı isə sosial şəbəkələrdə müxtəlif adamlar heç bir səbəb göstərmədən “Mübarizlə İsanı müqayisə etməyin, Mübariz İsanın dırnağı da ola bilməz. Mübariz insanlara, İsa isə böyük bir cəhalətə qarşı etiraz etdi” dedilər. Sizcə, bu adamları belə müqayisə aparmağa və məsələnin mahiyyətini bu qədər təhrif etməyə vadar edən nədir, kimdir? Bütün bunlar özbaşınamı baş verir? Bu ölümdən və onun gələcək “perspektivlər”indən yararlanmağa çalışanlar kimlərdir, hansı əqidənin sahibləridir, hansı ağanın qullarıdır? Haradan qaynaqlanır dəyərlər sisteminə qarşı bu düşmənçilik? Niyə bu gün cəmiyyətdə şəhidliyi elə birbaşa Mübarizin, Fəridin timsalında axmaq bir iş kimi qələmə verən, ancaq homoseksuallığı, azad seksi təbliğ edən “ideoloqlar” peyda olub? Niyə Ramilə başkəsən, ancaq İsaya qəhrəman deyən adamlar elə düz bu səhər yuxudan ayılıb belə müqayisələr apardılar?

 Buradan üzümü İsanın bütün dostlarına tutub deyirəm : – mən də sizi kimi onun ölümünə təəssüflənirəm. Çünki o seçməmişdi, seçdirilmişdi… Və İsa qəhrəman deyil, sadəcə, güdaza verilmiş və üzərindən oyunlar oynanılan zavallı bir qurbandır. (bunu ən yaxşı onun ölümünə səbəb olanlar bilir…) Qəhrəmanlar intiharı yox, yaşamağı seçirlər. Necə ki indi siz həyatdasınız, ey İsanın ən yaxın dostları! Növbəti qurbanın siz olmağını istəmirsinizsə, ayılın və əsl düşməni, dostunuzun ölümünə səbəb olanı, onu bu addımı atmağa vadar edəni və dolayısıyla növbəti mərhələlərdə sizin üzərinizdən oyunlar oynamağa çalışanları axtarın! Ən əsası, bu gündən etibarən sıralarınızın genişləndirilməsi adı ilə başqalarının da sizin kimi bu tora düşürülməsinə səbəb olmayın. Bunun üçün, sadəcə, öz vicdanınıza qulaq asmağınız kifayətdir…

Artıq İsa haqq dünyasındadır. Bizim isə bu vəziyyətdə ona deyəcək, sadəcə, bir sözümüz var : – canın yanmasın, İsa!

Kamal Yaşar (birlik.az saytının köşə yazarı)