ABŞ-da keçiriləcək prezident seçkilərində respublikaçı namizəd Donald Tramp Demokratlar partiyasında olan həmkarı Hillari Klintonu və hazırki prezident barak Obamanı İŞİD-i yaratmaqda ittiham edib. Seçki kompaniyasında rəqibi gözdən salmaq məqsədi ilə deyilmiş bu sözlər isə hazırda dünyanı dəhşətə salan İŞİD terror təşkilatının ABŞ tərəfindən yaradılması iddiasını bir daha gündəmə gətirib. Bəs, görəsən həqiqətənmi İŞİD-in yaradılmasında Amerikanın əli var?
Politoloqlar deyir ki, birbaşa olmasa da ABŞ İŞİD-in yaranmasına şərait yaradıb, ən azı isə buna göz yumub.
Politoloq Malik Liftiyev hesab edir ki, İŞİD-in bölgədə olması ən çox Amerikanın maraqlarına xidmət edir. Ancaq bu gün İŞİD ABŞ-ın idarə edə bilməyəcəyi bir qüvvə halına gəlib: "Hal-hazırda İŞİD dünyanın bir nömrəli terror təşkilatı sayılır. Bu təşkilat dünya ölkələri tərəfindən terrorçu təşkilat kimi tanınır. İŞİD-çilər baş kəsməklə, adamları diri-diri yandırmaqla insanlar arasında xof yaratmağa çalışırlar. Xüsusən də bu görüntülərin mediada yayılması İŞİD qorxusu yaradır. Lakin onların necə yaranması, daha doğrusu kimlər tərəfindən yaranması sualı hələ də açıq olaraq qalır. Bu suala cavab tapmaq üçün, əvvəla, onu nəzərə almaq lazımdır ki, İŞİD-in bölgədə olması kimlərə sərf edir? Cavab olaraq Amerikanın adını çəkmək olar. Bu, ilk növbədə ABŞ-ın maraqlarını müdafiə edir. Çünki, ABŞ İraqı tərk edəndən sonra bölgəyə nəzarət edəcək bir qüvvə lazım idi ki, burada amerikalıların maraqlarını müdafiə etsin. Yəni, əminliklə İŞİD-i ABŞ yaradıb deyə bilməsək belə , İŞİD-in yaranmasına ABŞ şərait yaradıb. ABŞ-da da belə düşünən kifayət qədər ekspertlər var. İran rəsmilərinin də bununla bağlı yetərincə açıqlamaları var”.
Politoloq onu da qeyd etdi ki, ilk vaxtlar İŞİD ABŞ-ın diqtəsi ilə hərəkət etsə də, indi tamamilə müstəqil, ABŞ-dan ayrı siyasət yürüdür: "İŞİD artıq lazım olduğundan daha güclü təşkilata çevrilib və ABŞ-da daxil olmaqla, heç bir dövlət ona nəzarət etmək iqtidarında deyil”.
M. Liftiyev qeyd etdi ki, Son zamanlar Türkiyənin İraq və Suriyaya müdaxiləsi İŞİD-i zəiflədib: "İŞİD-in əldə etdiyi torpaqlar İraq və Suriya ərazilərində yerləşir. Son zamanlar Türkiyənin bu ərazilərə hücumu İŞİD-çilərin işini çətinə salıb. Aldığımız son məlumatlara görə, İŞİD-in əlindən bütün neft yataqları alınıb. Bu, İŞİD-çilərin zəifləməsi və sonu deməkdirmi? Bu suala birmənalı cavab vermək mümkün deyil. Hər halda bunu zaman göstərər”.
Nigar

Xəbərdən istifadə edərkən istinad etmək vacibdir.