Bu gün Bakı Ağır Cinayətlər Məhkəməsində qətldə və oğurluqda ittiham olunan Babək Atamalıyev, Hüseynağa Ağayev və Musa Cavadlının cinayət işi üzrə məhkəmə prosesi başa çatıb.
Məlumata görə, prosesə hakim Ramella Allahverdiyeva sədrlik edib.
Prosesdə hökm oxunub.
Hökmə görə, B. Atamalıyev 19 il, digər təqirləndirilənlər - Musa Cavadlı 2 il 11 ay, Hüseynağa Ağayev isə 3 il 5 ay azadlıqdan məhrum ediliblər. M. Cavadlı və H. Ağayev məhkəmə zalında həbs olunublar.
Qeyd edək ki, martın 22-də saat 01 radələrində Məmmədov Namiq Əlibaba oğlunun Sumqayıt şəhəri, 13-cü mikrorayondakı 6 saylı binanın qarşısında üzərində zorakılıqla qətlə yetirilməyə xarakterik xəsarətlərlə meyiti aşkar edilib. Faktla bağlı Sumqayıt Şəhər Prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanıb.
Məlum olub ki, N.Məmmədov doğulduğu gün qətlə yetirilib. Hadisə şahidləri bildirib ki, mərhum gənc işdən qayıdarkən siqaret almaq üçün məhəlləyə yaxın ərazidə dükana girib. Mağazadan çıxan N.Məmmədova 3 şəxs yaxınlaşıb və siqaret istəyiblər. N.Məmmədovun onlara siqaret vermək istəməməyi mübahisəyə səbəb olub. Beləliklə, mərhumu təqib edən həmin şəxslər həyətə girənə qədər onu söyüb təhqir ediblər. Təhqirlərdən bezən N.Məmmədov həyətə girən kimi, blokun önündə dayanan 4 qonşunu köməyə çağırıb.
Qonşuların mübahisəyə müdaxiləsi vəziyyəti daha da ağırlaşdırıb. Belə ki, siqaret arzusunda olan şəxslərdən biri - 1996-cı il təvəllüdlü B.Atamalıyev üzərində gəzdirdiyi bıçağı çıxararaq N.Məmmədovu vurub və qaçıb. Qonşular qatilin arxasınca qaçmaq istəsələr də o, əlindəki soyuq silahla hamını hədələyərək aradan çıxa bilib.
N.Məmmədovu öldürəndən sonra qatil və onun yanındakı digər şəxslər növbəti cinayəti törədiblər. Qonşu məhəlləyə qədər qaça bilən şəxslər dükan yarıblar və məhz bu zaman polis tərəfindən tutulublar.
H.Ağayev və M.Cavadlı yetkinlik yaşına çatmadığından onların barəsində həbs qətimkan tədbiri seçilməmişdi.(Virtualaz.org )

Xəbərdən istifadə edərkən istinad etmək vacibdir.