Bakı və Sumqayıt ərazisində 10-a yaxın dövlət müəssisəsi və özəl şirkətlərdən silsilə seyf oğurluqları törətməkdə şübhəli bilinən şəxslər saxlanılıb. Əvvəllər məhkum olunmuş Rafiq Məmmədov, Qadir Əliyev, Rauf İbrahimov və Amil Cavadovun oğurladıqları seyflərdən külli miqdarda maddi vəsait əldə etdikləri məlum olub. Zərərçəkənə külli miqdarda ziyan vurmaqla törədilən sonuncu belə hadisələrdən biri Nərimanov rayonu ərazisində baş verib. Naməlum şəxs və ya şəxslər avqustun 19-da Nazpəri Dostəliyevanın mənzilinə açarseçmə üsulu ilə daxil olaraq yataq otağından içərisindən külli miqdarda qızıl-zinət əşyaları və pul olan dəmir seyf oğurlayıblar. Həyata keçirilən tədbirlər nəticəsində cinayət hadisəsinin Sumqayıt sakinləri əvvəllər məhkum olunan Ruslan Verdiyev, Yunis Hüseynli və Asif Həmidov tərəfindən törədildiyi müəyyənləşdirilib. Onların yaşadıqları mənzillərə baxış zamanı oğurluq yolla əldə etdikləri maddi vəsaitlərin bir qismi aşkarlanıb. Həmçinin Asif Həmidovun avtomobilindən,Yunis Hüseynli və Ruslan Verdiyevin yaşadıqları ünvanlardan narkotik vasitə olan heroin aşkar edilərək götürülüb. Göstərilən faktlarla əlaqədar cinayət işi başlanılıb.