Sosial şəbəkələrdə tanış olduğu insanları dələduzluq yolu aldadan şəxsin saxlanılması istiqamətində polislər tərəfindən əməliyyat tədbiri həyata keçirilib.
DİN-dən Xeberle.com-a verilən məlumata görə, Nərimanov Rayon Polis İdarəsi 18-ci Polis Bölməsinə müraciət edən zərərçəkən Şirvan şəhər sakini Rəsul Mehdiyev İnstaqram sosial şəbəkəsində onun videolarını paylaşan "Dublaj.Vine.Baku” adlı səhifənin istifadəçisi ilə tanış olduğunu və onunla görüşən zaman mobil telefonun həmin şəxs tərəfindən oğurlandığını bildirib.
Bölmə əməkdaşlarının həyata keçirdikləri əməliyyat nəticəsində həmin səhifənin sahibi Bakı şəhər sakini, əvvələr məhkum olunmuş Ramin İsmayılov saxlanılıb. O, ifadəsində törətdiyi cinayəti etiraf edib.
Qeyd edilən faktla bağlı araşdırmalar davam etdirilir. Polis əməkdaşları dələduzluq etməkdə şübhəli bilinən Ramin İsmayılovun digər analoji cinayətlərdə iştirak etdiyini də istisna etmir. Onun əməllərindən zərərçəkən başqa şəxslər varsa, bu barədə Daxili işlər Nazirliyinin "102” Zəng Mərkəzinə və ya Nərimanov Rayon Polis İdarəsi, eləcə də 18-ci Polis Bölməsinə müraciət edə bilərlər.
Report-un məlumata görə, dələduzluqda şübhəli bilinərək tutulan Ramin İsmayılov sosial şəbəkələrdə "Ramin Yeraz” adı ilə tanınan ifaçıdır. O, özünü "Ramin Yeraz prodakşn”ın sahibi kimi təqdim edir, Yutub, İnstaqram, Feysbuk və digər sosial şəbəkələrdə aktivliyi ilə seçilir. Onun sosial şəbəkələrə yüklədiyi mp3 musiqilərinin əvvəlində, ortasında və axırında "Ramin Yeraz prodakşn təqdim edir” cümləsi səslənir.

Xəbərdən istifadə edərkən istinad etmək vacibdir.