Ulu öndərimiz Heydər Əliyev 1969-cu ildə hakimiyyətə gələndə elə bil ab- hava, insanların işə, təhsilə münasibəti dəyişdi. Əvvəllər deyirdilər ki, prokurorun oğlu prokuror, məhkəmə sistemində işləyənin övladı həmin sistemdə işləməlidir. Amma Heydər Əliyevin gözəl bir həyat devizi var idi: " Qoy ədalət zəfər çalsın!”. Yəni kimin qabiliyyəti, savadı, intellekti var getsin oxusun. Özü də çoxsaylı şagirdlərə dəstək olurdu. Uzun müddət gündəmdə olan və öz həll yolunu tapmayan məsələləri Heydər Əliyev yoluna qoydu, tənzimlədi. Yeni yollar salındı, məktəblər, uşaq bağçaları tikildi, kənd təsərrüfatında daha irimiqyaslı layihələr həyata keçirildi. İndiki kimi yadımdadır, o dövrdə SSRİ Nazirlər Sovetinin "Dağ rayonlarının sosial iqtisadi inkişaf  problemlərinin həlli” ilə bağlı böyük bir dövlət proqramı var idi. O proqramdan bizim rayon da çox bəhrələndi. 23-ə yaxın müasir layihə əsasında gözəl məktəblər,16 bağça və körpələr evi  tikildi. Digər məktəblərimizin də hamısı yeni binalara köçdü.
 
    Zaman dəyişdikcə insanlar da dəyişir. O dövrdə hadisələrə baxış başqa cür idi. İndiki dövrdə də hazırcavab, savadlı, intellektli gənclərimiz çoxdur. Mən təhsil işçisi kimi bunu çox yüksək qiymətləndirirəm. Bizim dövrdə gənclərin əsas kriteriyaları oxumaq, valideynlərinə kömək olmaq idisə, hazırda bu kriteriyalar bir qədər başqa fona, başqa müstəviyə keçib. Ona görə də, bütün dövrlərdə  təhsil məsələsi aparıcı məsələlərdən olub və hələ də öz gücündə qalmaqdadır.
 
 
 
     İşğal gününü Qubadlı rayonunda yaşayan  insanların hər hansı birindən soruşsanız, inanmıram ki, onlar həmin günü unutmuş olarlar. Erməni silahlı birləşmələri rayonun strateji ərazilərinənəzarət edirdilər. Kəndlər iri çaplı silahlardan  atəşə tutulur, evlər yandırılırdı. İnsanlara rəhm olunmadan divan tutulurdu. Təsəvvür edin ki,  az bir müddət ərzində, təxmini 6-7 saat müddətində necə olursa-olsun rayondan çıxmalısan. Elə, obaya böyük sevgi bəsləyən gənclər, 60-70 yaşlı qocalar, uşaqlar məcburiyyət qarşısında kəndi tərk etməli idilər. Onlar çox qısa bir zaman kəsiyində ağlaya-ağlaya, ən bədbin hissləri keçirə-keçirə rayon ərazisindən çıxmağa məcbur oldular. Bunları sözlə ifadə etmək çox ağırdır.Allah heç kəsə göstərməsin, amma həmin hadisələri görməsən, müşahidə etməsən, proseslərin içərisində olmasan  o hissləri duymaq çətindir.  Torpaqlarımızın müdafiəsi zamanı çoxsaylı şəhidlərimiz oldu. Onlardan 8 nəfər Milli Qəhrəman adına layiq görlüb.

 

     Məcburi köçkünlükdən sonra rayon əhalisi respublikanın müxtəlif bölgələrində, daha çox Sumqayıt, Bakı, Abşeron ərazisində məskunlaşdılar. İlk vaxtlardan başlayaraq əhalinin kompakt yaşadıqları ərazilərdə şagirdlər təhsilə cəlb olundu. Məktəblər xeyli primitiv, şəraitsiz binalarda binalarda fəaliyyət göstərirdi. Sonradan məktəblərin xeyli hissəsi şəraitsizlikdən, bina çatışmazlığından öz fəaliyyətlərini dayandırdı. Hazırda rayonumuzun ümumtəhsil məktəblərində 719 nəfər müəllim fəaliyyət göstərir. O dövrün müəllimlərinin isə əksər hissəsi yaşları ilə əlaqədar təqaüdə çıxıblar. Amma yenə də bəzi müəllimlərimiz var ki, işğaldan əvvəl də, indi də Qubadlı rayonunun təhsil sitemində fəaliyyət göstərirlər və öz işlərini ləyaqətlə yerinə yetirirlər. Qeyd edim ki, baş verən hadisələr insanlarda bədbinlik yaratmışdı, təsəvvür edin ki, onlar qaçıb Azərbaycanın müxtəlif regionlaınrda yarı ac, yarı tox yaşayırdılar. Biz bu hadisələri yaşadığımız günlərdə ulu öndər Heydər Əliyev bizə inanc, güvən yeri oldu. O, dəfələrlə məcburi köçkünləri qəbul edərək onların problemlərinin həlli  istiqamətində xeyli işlər gördü. Təhsil sisteminin təkmilləşdirilməsi yolunda addımlar atdı. 2001-ci ildə  Rayon İcra Hakimiyyətinə başçı təyin olunan Malik İsaqovun birbaşa nüfuzu və köməkliyi ilə məcburi köçkünlər üçün 11 yeni məktəb tikildi. Digər  21 məktəb təmir olunaraq yeni avadanlıqlarla təmin edildi. Məktəblərin hamısında istilik sistemi quraşdırıldı, onların iş şəraiti yaxşılaşdırıldı, pedoqoji sahəyə diqqət daha da artırıldı, intellektli, novator müəllimlərin əməyinin qiymətləndirilməsi üçün çoxsaylı tədbirlər həyata keçirildi. Bu gün əldə olunan bütün bu nəticələrdə cənab başçının böyük payı vardır. Biz çox şadıq ki, əvvəllər qaçqınlardan "Məcburi köçkün məktəbləri”nə uşaq qoymaq istəməyənlər,  indi öz uşaqlarını böyük həvəslə bizim məktəblərə gətirirlər. Cari dərs ilində ali məktəblərə sənəd verən 419 məzundan 297 nəfəri (71%) ali məktəblərə qəbul olmuş, şagirdlərimizdən 5356 nəfəri (64%) məktəbi əla və yaxşı qiymətləri bitirmişlər. Məktəblərimizin şagirdləri  hər il yüksək təlim göstəriciləri ilə seçilirlər.
Biz yaxşı başa düşürük ki, hazırki şəraitdə işğal olunmuş ərazi olan Cocuq Mərcanlıya  qayıdış prezidentimiz, ali baş komandan İlham Əliyevin səyi ilə digər işğal olunmuş rayonlarımıza da tezliklə şamil ediləcəkdir. Bütün bunlar bizdən həmin ərazilərdə fəaliyyət göstərən düşüncəli, intellektli, vətənpərvər gənclərin yetişdirilməsini tələb edir. Bu, biz təhsil işçiləri qarşısında duran ən böyük vəzifədir.
Xeberle.com

Xəbərdən istifadə edərkən istinad etmək vacibdir.