Məşhur teleaparıcı Nəsimi Nəbizadə: "Onsuz da heç vaxt heç kəs kitab dilində danışmayacaq..."

Sizə təqdim etdiyimiz yeni rubrikada Sumqayıta yaxından, uzaqdan bağlılığı olan tanınmış insanlarla səmimi söhbətimizi oxuyacaqsınız.  Budəfəki qonağımız  AzTV- də uzun müddət çalışmış, illərin aparıcısı Nəsimi Nəbizadədir.

 - Əvvəllər sizi tez-tez Sumqayıtda görərdik. Son vaxtlar görünmürsünüz. Nə məsələdir?

- Mən Sarayda yaşayıram. Mənim şəhərim Sumqayıtdır - Gənclik şəhəri.

 -  İstedadınıza güvənib aparıcı oldunuz, yoxsa arzunuzu reallaşdırdınız?

- Bəri başdan deyim ki, televiziya tarixində orda işləyənlər arasında ən təsadüfi adam mənəm... Nə arzum olub, nə də öz istəyimlə 1996-cı ildə AzTV-də keçirilən müsabiqəyə gəlmişəm...  Dayım məni zorla aparıb o müsabiqəyə. Sürücü olsa da, ədəbiyyatı çox yaxşı bilən, mütaliəli bir kişidir dayım. Mən də ədəbiyyatı çox sevən adamam, ətrafım, dostlarımın çoxu da ədəbiyyatçılardır.  O  vaxt müsabiqə keçirildi, azı 400-500 gənc iştirak edirdi. Dayim da bayaq dediyim kimi, məni zorla aparıb teleteatrın qapısından itələyib saldı içəri. Uşaqlıqdan prokuror olmaq istəyən adam ordan, o qapıdan diktor kimi çıxdı.

- Nəsimi bəy, ilk müəlliminiz kim olub?

- Həə, onu ən azı 30-40 il bundan əvvəlin insanları tanıyır. Mənim USTADım Sabir Axundov olub.  Siz onu heç tanımazsınız. O, təkcə mənim müəllimim yox, hazırda korifey adlandırdığımız köhnə diktor nəslinin də müəllimi olub. O, böyük MÜƏLLİM idi. Ruhu şad olsun!

-  Deyirlər, AzTV böyük bir məktəbdir, bir çox tanınmış diktorlar bu məktəbin yetirmələridir. Fikrinizcə, hazırda da bu ənənə davam edirmi?

-  AzTV məktəb deyil, akademiyadır. Sözün bütün mənalarında. Məncə, o məktəbin hazırda sonuncu zəngulələri vurulur orda. Rafiq Hüseynova can sağlığı diləyirəm. Onun tələbələrindən var orda, necə deyərlər, onun tökdüklərini yığıblar. Rafiq müəllimin tələbələri təkcə AzTV-də deyil axı, bütün teleməkanda var.  Onun iziylə gedənlər var. O uşaqlar davam etdirirlər. Bax sonra nə olacaq, onu mən bilmirəm.
 - Aparıcı olmaq üçün ali təhsil vacibdir?

Hə.., bax bu sual mənə ləzzət elədi. Belə bir anlayış var - qabiliyyət. Qabiliyyəti olmayan insanın ali yox e, lap akademik təhsil almasının belə xeyri yoxdur. Özü də istənilən sahədə. Mənə gəldikdə, mən aparıcı olmamışam, diktor olmuşam. Bu isə daha çətin sənətdir. Ona görə ki, kiminsə mətnini olduğu kimi, amma daha dəqiq, yəni müəllifin özünün təqdim edə biləyəcəyi səviyyədən daha üstün çatdırmalısan tamaşaçıya. Bunun üçünsə ürək lazımdır, hissiyyat lazımdır. Bax sizə adi bir misal çəkim. 50-70-ci illərdə Əliağa Ağayev, Ağahüseyn Cavadov, Ağasadıq Gəraybəyli və digər aktyorların heç birinin nəinki ali təhsili, heç orta təhsili olmayıb. İndiki zamanda ali təhsilli aktyorların əksəriyyətinə baxın.

- Müsahibələrinizin birində söyləmisiniz ki, mən AzTV məbədinin kahiniyəm. Məbəddən ayrılmaq kahin üçün çətin olmadi ki?

- Mən bayaq dedim axı, televiziya məkanında təsadüfi adamam. AzTV-də isə nə bacardıqsa, etdik.  17 ilimi vermişəm məbədə, halal xoşu. Mən də AzTV-nin hesabına tanınmışam, Nəsimi Nəbizadə kimi az-çox hörmət qazanmışam, bəsimdir. AzTv-yə mən borclu qalmışam, nəinki o mənə. Amma məbəd məni bağışlayar yəqin ki...  Kahin söhbətinə gəldikdə isə, mən elə yenə oranın kahiniyəm. Ən azı ölənə qədər adım hallanacaq AzTV-də.

- Efirdə olanda özünüzə hansı qadağaları qoyurdunuz?

- Bir cümlə ilə deyim: 4 gözüm olur, 8 qulağım və buna baxmayaraq tam sərbəst!

- Sizə səhv tutulan zaman reaksiyanız necə olur?

-  Mənim artıq elə bir yaş dövrümdür ki, həm həyatda, həm də işdə imkan vermirəm ki, məndən səhv tutsunlar. Bilməmək eyib deyil, öyrənməmək eyibdir. Nəyisə bilməyəndə həm həyatda, həm də işdə, dəqiqini soruşacağım adamlar var.

- Ləhcə ilə danışan efir aparıcılarına münasibətiniz?

Bununla mən yox, Milli Teleradio Şurası məşğul olmalıdır. Eyni zamanda kanal rəhbərləri. Televiziya mükəmməlliyi sevir. Ləhcə elə bir şeydir ki, bunu yığışdırmaq mümkün deyil, bu həm də gözəllikdir, dilin zənginliyidi. Televiziyada qarşısı bir az alınmalıdır, vəssalam. O da informasiyada. İndiki zamanda tərəfdarıyam ki, ləhcələrimizə aid verilişlər olsun. Yenə deyirəm, bu, dilin zənginliyidir. Onsuz da heç vaxt heç kəs kitab dilində danışmayacaq.

- Sizcə, jurnalist cəmiyyəti dəyişdirə bilər? Axı jurnalist 4-cü hakimiyyətdir.

- Kim sizə deyib ki, jurnalist 4-cü hakimiyyətdir? Bu bir "ifadə"dir bəzi ölkələrdə. Bəzi ölkələrdə jurnalistlər fədaidirlər, bəzi ölkələrdə isə jurnalistlərin özləri sizin nəzərdə tutduğunuz cəmiyyətdir.

- Gənc həmkarlarınızdan kimləri bəyənirsiniz?

-  Həmişə demişəm Ceyhun Əli.

- Hazırkı fəaliyyətiniz barədə öyrənmək bizim üçün maraqlı olardı.

- Hazırda işlərim daha çoxdur. Bütün ciddi KİV-lərdə hamının işə gələndə saytlarını birinci açdığı APA Holding-dəyəm və sevinirəm ki, APA TV olaraq biz də bu Cənubi Qafqazın ən böyük media şirkətinin işinə öz dəstəyimizi veririk.

-Efir insanı olmağınızın şəxsi həyatınızda oynadığı rol varmı?

- Böyük rolu var. Efir insanı insan kimi yaşamağa qoymur.

- Özünüzü görmək istədiyiniz pillədəsiniz?

- Nə qədər ayağımız yeriyirsə, pillələr də bitməyib demək. Gələcək göstərər.

- Belə hazırcavab olmağınızı oxuduğunuz kitablara borclusunuz?

- Kitab oxuyuram, amma əzbərləmirəm.

Zeynab Abdullah, xeberle.com