Vulkan üzərində formalaşan qəribə buludlar elm xadimlərini də təəccübləndirdi. Rusiyanın Kamçatka yarımadasındakı Sopka vulkanında lentə alınan görüntülər geniş müzakirələrə yol açıb. Səbəb isə, buludların bu vulkan üzərində yumrulanaraq uçan naməlum obyekt forması almasıdır.

Fotoqraf Vladimir Voyçukun lentə aldığı görüntülərdə hərkətdə olan buludların vulkan üzərində sanki maqnit sahəsinə düşdüyü öz əksini tapır. Dairəvi formaya düşən buludların kənardan baxanda yadplanetlilərə məxsus uçan boşqaba bənzəməsi bir sıra suallar ortaya çıxarıb. Buludların vulkan üzərində forma dəyişdirməsinə səbəb nədir?

Hələlik bu suala cavab tapan olmayıb. Dünyanın dörd bir yanında vulkan olsa da, onların üzərində buludların bu formaya düşdüyünə demək olar ki, rast gəlmək mümkün olmur.  Rusiyalı fotoqraf isə deyir ki,  Sopka vulkanı üzərində əvvəllər də belə hadisə baş verib. Sadəcə olaraq ilk dəfə lentə almaq mümkün olub.

Vulkanşünasların fikrincə Sopka vulkanı üzərində  uçan naməlum obyekt formalı buludların yaranmasına səbəb,  vulkandan yayılan buxar və tüstüdür.