Macarıstanın paytaxtı və ən böyük şəhəri olan Budapeşt, Avropanın ən füsunkar şəhərlərindən hesab olunur. Budapeşt turunda iştirak etdikdə şəhərin ortasından keçən Dunay çayının atmosferi dərhal sizi öz təsiri altına salacaq. Dunay çayının iki qolundakı Buda və Peşt-in 1873-cü ildə birləşməsi ilə yaranan bu çay ziyarətçilərini məst etməyə davam edir. Budapeşt Avropanın həqiqi "inci"sidir. Yaşıllıqlarla əhatələnən şəhərdə gəzməli-görməli yerlərin sayı ürəyin istəyən qədərdir. Məsələn, barokko üslubundakı məhəllələr, möhtəşəm teatr və saraylar özlərində imperiya ruhunu saxlayıblar. Qədim macar krallarının və müqəddəslərinin, macar torpağının fatehlərinin abidələri, görkəmli parlament binası günün istənilən çağında işıq saçır.

Budapeşt obrazlı şəkildə desək, dünyanın ən romantik şəhəri sayılır. Bu romantik mənzərənin mərkəzində Dunay çayı dayanır. Çayın üzərindəki körpülər xüsusilə gecələr par-par yanır. Şəhərin gecə mənzərəsi ən azı gündüzləri qədər gözəldir. Şəhərin gözəlliyini seyr etmək istəyən turistlər üçün ən ideal yer Stedella təpəsidir. Budapeştin bu ən hündür təpəsindən şəhərin həm Buda, həm də Peştə tərəfi bütün gözəllikləri ilə insanın ayağının altına sərilir. Qıvrıla-qıvrıla axan Dunay çayı isə Budapeşti iki yerə ayırır. Turistlərin marağına səbəb abidə Budapeştin ən böyük meydanı olan Qəhrəmanlar meydanıdır. Bu meydanda tarixi şəxsiyyətlərin heykəllərini görə bilərsiniz. Macar qəhrəmanları içində Hun imperiyasının əfsanəvi imperatoru Atillanın ən öndə dayanması diqqəti cəlb edir. Yeri gəlmişkən, qeys edək ki, hazırda da Atilla yeni doğulan macar oğlan uşaqlarına ən çox verilən adlardan biridir. Bu da Macarıstanın bir daha qədim türk diyarı olmasını əks etdirən növbəti bir sübut kimi söylənilir. Avropanın ən gözəl şəhərləri sırasında olan Budapeştin füsunkar təbiəti ilə yanaşı, qeyd etdiyimiz kimi, tarixi memarlıq abidələrilə də çox zəngindir. Şəhərdə ilk olaraq gözə çarpan qeyri-adi üslubda inşa edilən parlament binasıdır. Bu möhtəşəm sənət əsəri həm də Avropanın ən böyük parlament binalarından biridir. Turizmə çox böyük əhəmiyyət verən macarlar hətta parlament binasının qapılarını belə, turistlərin üzünə açmaqdan çəkinmirlər. Macar krallarının 1000 illik tacı da bu binada qorunur. Tarixi macar ənənələrinə görə bu tacı qoymayan kralın krallığı sayılmazmış. Ona görə də krallar bu tarixi simvolu öz gözləri kimi qoruyublar. Ancaq buna baxmayaraq, hardasa ölkənin dövlət simvolu sayılan tac dəfələrlə oğurlanıb. Sonuncu dəfə İkinci Dünya müharibəsi vaxtı ABŞ-a qaçırılan tac 1975-ci ildə geri qaytarılıb. Dəfələrlə qaçırılan tac əldən-ələ o qədər gəzib ki, üstündəki xaç əyilib.

Macarların böyük əhəmiyyət verdiyi bu tac 2000-ci ildən parlament binasında saxlanılır. Budapeştə xüsusi gözəllik verən sənət əsərlərindən biri də Avstriya-Macarıstan imperiyasından qalan nəhəng heykəllərdir. Şəhər buna bənzər çoxlu qədim və möhtəşəm memarlıq abidələrinə sahib olmaqla bərabər, təmiz və səliqəli küçələri, gözəl yolları ilə də diqqəti çəkir. Paytaxtda tolerantlığın və sevginin simvolu olan Gül Baba türbəsi var. Macar xalqının da çox sevdiyi bu tarixi şəxsiyyət 16-cı əsrin əvvəllərində Osmanlı hökmdarı Qanuni Sultan Süleyman zamanında Macarıstana gəlmişdir. Dərviş olan bu nurüzlü insan başındakı sarığında hər zaman gül daşıdığına görə macarlar ona Gül Baba adını veriblər. Qarşılaşdığı hər bir macara gül verən Gül Baba qısa zamanda macarlar tərəfindən çox sevilib. Ona görə də əsrlər keçsə də, dərviş Gül Babanı macarlar hələ də unuda bilməyiblər. 1541-ci ildə Budin müharibəsində şəhid olan Gül Baba Budapeştin ən mötəşəm mənzərəli təpəsində dəfn edilib. İkinci Dünya müharibəsində türbəsi dağılan Gül Babanın qəbri 1965-ci ildə hökumətin qərarı ilə təmir edilərək təkrar əvvəlki gözəlliyinə qovuşub. Budapeştin dünya mirası siyahısına salınan ən gözəl parklarından biri də Hortobay parkıdır. 70 min hektarlıq böyük bir ərazidə qurulan bu park şəhər əhalisinin və turistlərin ən əyləncəli istirahət məkanlarından biridir. Gözəl macar otlağında salınan bu park bir-birindən fərqli və dəyərli atları ilə də turistləri valeh edir. Həm də qoruq kimi fəaliyyət göstərən parkda iki metrə yaxın boyları və gözəllikləri ilə seçilən macar atlarını görə bilərsiniz. Bu atların 100 min dollar və daha artıq qiyməti var. Macarlar, digər Avropa ölkələrindən fərqli olaraq, atları çox sevir və atlar qədim macar ənənəsinin bir parçasıdır. Minlərlə turist macarların at üzərindəki şousunu izləmək üçün buraya axışır. Beləliklə, Budapeşt barəsində qısa bir arayış verməyə çalışdıq. Yaxşı bir el məsəli var, yüz dəfə eşitməkdənsə, bir dəfə görmək yaxşıdır. Odur ki, sizlərə Avropaya səyahət etmək üçün Macarıstan paytaxtından başlamağı tövsiyə edirik. Bu səyahət zamanı və büdcə xərcləri baxımından da çox sərfəlidir.

Bildiyiniz kimi, Bakıdan Budapeştə birbaşa Wizz Air hava yolları ilə bir tərəfə cəmi 60 avroya uça bilərsiniz. Sizə uğurlu və xoş istirahətlər arzu edirik.