“Müəllimim xalq artisti, professor Rafiq Hüseynov tövsiyə etmişdi ki, efirə çıxanda viski iç, hər şey çox yaxşı olacaq”

 Budəfəki qonağımız Azərbaycan Televiziyasının gənc aparıcısı Rəşad Mehdilidir. Onu siz həm “Xəbərlər” informasiya proqramı, həm “Səhər” musiqili informasiya proqramı, həm də “1001 sual” intellektual oyunundan tanıyırsınız. İndisə keçək Rəşad Mehdili ilə söhbətimizə.

- Rəşad bəy, əvvəla sizi xoş gördük! Suallarımıza cavab verməyə tam hazırsınızmı?  

- Adətən mən müsahiblərə suallar verirəm. Bu dəfə isə qonaq qismindəyəm və keçirdiyim hisslər də fərqlidir. Dəvət etdiyiniz üçün təşəkkürümü bildirirəm. Buyurun, suallara cavab verməyə hazıram…

- Özünüzü nə vaxtdan aparıcı kimi gördünüz?

- Hər bir insanın həyatda müəyyənləşdirdiyi yol olur. Bu, iş həyatına da aiddir. Mən bu seçimimi illər öncə, universitetə daxil olduğum zamandan vermişdim. Elə o vaxtdan peşəkar bir mühitdə həm jurnalist, həm də aparıcı kimi yetişmək arzum idi. Tale elə gətirdi ki, arzumun gerçəkləşməsini çox gözləmədim. 2007-ci ildə AzTV-də yeni kadrlar işə cəlb olundu. Bununla bağlı müsabiqə elan edilmişdi. Düşündüm ki, çox yaxşı fürsətdir və bunu dəyərləndirmək lazımdır. Müsabiqədə iştirak etdim, 800-ə yaxın namizəd arasından seçildim.

- Xəbər aparıcısı olmaq asandır, yoxsa "Səhər" kimi əyləncəli verilişin aparıcısı?

- AzTV-nin digər kanallardan fərqi ondadır ki, burda hər bir iş keyfiyyətlə və peşəkarlar tərəfindən yerinə yetirilir. Böyük tarixə malik bu televiziya əsl məktəbdir. Peşəkarlıq və keyfiyyət əsas meyar olduğu zaman işləmək də rahatdır. Təbii ki, mənim aparıcısı olduğum verilişlər bir qədər fərqlidır, amma onların ortaq xüsusiyyəti var - hər ikisi informasiya proqramıdır. O baxımdan mən özümü rahat hiss edirəm. Asanlığa gəldikdə isə, düşünürəm ki, bir insan çalışırsa, əmək sərf edirsə, ona asanlıqdan söhbət gedə bilməz. Bunun hamısı zəhmətdir.

- Özünüzü ancaq AzTV-də görürsünüz?

- Hər kəs özünü peşəkar komandanın əhatəsində görmək istəyir. AzTV-də isə bu komanda var. Üstəlik, əlverişli yaradıcı mühit mövcuddur və nəzərə alsaq ki, AzTV ölkədə ən güclü maddi-texniki baza ilə yanaşı, MDB məkanında analoqu olmayan çəkiliş meydançalarına və studiyalara malikdir. Əgər insan işini sevirsə, özünə başqa kanal axtarar?!

 - Bəs AzTV-də efirə gedən verilişləri necə, izləyirsinizmi?

- Təbii, izləyirəm. Həm yerli, həm xarici telekanalları mütəmadi olaraq izləyirəm. AzTV-nin hazırladığı verilişlər öz keyfiyyətinə görə bütün telekanallardakından fərqlənir. Bu reallıqdır ki, Azərbaycan mədəniyyətini, musiqisini, milli dəyərləri AzTV yüksək səviyyədə təbliğ edir.

- Canlı efir zamanı keçirdiyiniz ilk həyəcanı xatırlayırsınızmı?

- İnsan ilk sevgisini unudarmı?! Unutmaz! Odur ki, ilk efirimi çox yaxşı xatırlayıram. Belə ki, efirə ilk çıxdıqda çox həyəcanlıydım. Müəllimim xalq artisti, professor Rafiq Hüseynov tövsiyə etmişdi ki, efirə çıxanda viski iç, hər şey çox yaxşı olacaq. Bunu etmədim, dedim yox, çox sakitəm. Jurnalistin ilk efirə çıxmağı xüsusi “mərasim” olur, desəm, yanılmaram. Xəbər komandası hər şeyi qabaqcadan hazırlayıb ki, mənə rahat olsun. Və nəhayət, ilk efirin zamanı gəldi, mən studiyada əyləşmişəm, başlıq gedəndən sonra rejissor komanda verir: “Buyur, Rəşad...”  Rəşad donub. Sadəcə, kameraya baxıram  Operator işarə edir: “Başla!”, növbətçi redaktor gülür, saniyələr gedir və birdən ayılıram ki, efirdəyəm axı... Tez salamlaşdım və ardınca xəbər başlıqlarını oxumağa başladım. Bir də onu gördüm ki, texniki, yaradıcı heyət dərindən bir “ah” çəkdi. Beləliklə, birinci efirim belə həyəcanlı keçdi.

- Azərbaycan teleməkanında nələri görmək istərdiniz?

- Azərbaycan teleməkanında peşəkarlar olmalıdır, çünki TV cəmiyyətdən bir addım öndədir. Bunu isə yalnız peşəkarlar edə bilər. Və mən qürurla deyə bilərəm ki, AzTV bu kanallardan birincisidir. Digər kanallara da cəmiyyətdən bir addım öndə olmağı arzu edirəm.

- Xəbər aparıcıları arasında özünüzə kimləri rəqib görürsünüz?

- İnkişaf üçün sağlam rəqabət vacibdir. Bu baxımdan tanıdığım bütün xəbər aparıcılarını özümə sağlam rəqib görürəm. AzTV-dən həmkarım Ruslan Həsənov, İTV-dən Ramiz İdrisoğlu, Lider TV-dən Mehman Mehdiyev, ATV-dən Ceyhun Səfərov.

- Azərbaycanda aparıcılıq məktəbi hansı səviyyədədir?

- Ölkədə televiziya ənənələrini saxlayan və inkişaf etdirən AzTV-də bu məktəb hər zaman olub. Özumu çox şanslı insanlardan biri hesab edirəm ki, aparıclıq peşəsini mənə Rafiq Hüseynov öyrədib. Bu gün AzTV-də neçə-neçə jurnalist, aparıcı məhz bu cür peşəkarlardan faydalanırlar. Bundan başqa, burada Televiziya Akademiyası da fəaliyyət göstərir.

- İlk baxışdan özünüzdən razı biri kimi görünürsünüz. Bu görünüş sizdə insanlarla münasibətdə çətinlik yaratmır ki?

- “Hər parıldayan qızıl deyil” - belə bir misal var. “Özündən razı” - bunu ünsiyyət qurmadığın insanla bağlı söyləmək düşünürəm ki, doğru deyil. Mən bəzən tanımadığım insanlarla ünsiyyət qurmaqda çətinlik çəkirəm. Hamıya gülümsəmək və xoş görünmək məcburiyyətini özümdə görmürəm.

- Gələcəkdə Sumqayıtı digər bir şəhərlə əvəz etmək fikriniz varmı?

- Sumqayıtın ayrı bir gözəlliyi və rahatlığı var. Bu şəhər mənə çox doğmadır. Hər guşəsində xatirələrim var. Ona gorə də doğma şəhəri heç dəyişmək istəmərəm. Dəyişsəm belə, Sumqayıt hər zaman mənim uşaqlıq və gənclik şəhərim olacaq!

- Uşaqlıq illərinizin sıx dostluq münasibətlərini bu gün Sumqayıt gənclərində görürsünüzmü?

- Hər bir dövrün öz tələbi var və yəqin ki, bu dövrün də tələbi bu cür yaşanan dostluqlardır. Buna üsyan etmək lazım deyil. Əmin ola bilərsiniz ki, bu zamanın dostluğu da bizdən əvvəlki nəslin xoşuna gəlmirdi.

- Təzadlarla dolu olan bir dünyada insanlara güvənmək mümkündürmü?

- Niyə mümkün olmasın?! İnsan güvənməsə, yaşaya bilməz. Ailənə, doğmalarına, dostuna, yoldaşına güvənmədən yaşamaq mümkün deyil. Və “mən heç kimə güvənmirəm” ifadəsini işlədən insanların ağ yalan danışdıqlarını düşünürəm .

- Necə fikirləşirsiniz, 65 yaşında olan gənclər şəhəri kimi tanınan Sumqayıt mənən qocalmayıb ki?

-65 yaş bir şəhər üçün hələ körpəlik dövrüdür. Ona görə də 65 yaşlı körpəni sevməliyik və onun qayğısına qalmalıyıq. Çirkləndirməməliyik, sökməməliyik, bacardığımız qədər gözəlləşməsinə çalışmalıyıq.

- Bu gün əldə etdiklərinizdən razısınızmı?

- Düşünən insan əldə etdikləri ilə kifayətlənməməlidir. O, bunu etdiyi an sonunu hazırlamış olur.

Müsahibəni aldı: Zeynab Abdullah
Xeberle.com