Sumqayıt Dövlət Universitetində tədris şəraitinin yaxşılaşdırılması və istilik təminatının müasir tələblərə uyğun şəkildə yenidən qurulması məqsədilə 3-cü tədris binasında qazanxana və istilik sisteminin əsaslı təmirinə başlanılıb. Mövcud qazanxana sistemi texniki cəhətdən müasir standartlara cavab vermədiyindən, tamamilə yeni, daha etibarlı və davamlı fəaliyyət göstərəcək qazanxana və istilik sistemi qurulacaq. O, yeni avadanlıqlar və idarəetmə sistemi ilə təmin ediləcək. Bununla bağlı Azərbaycan Respublikası Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin Təsisatdankənar Dövlət Ekspertiza Baş İdarəsinin 28.11.2024-cü il tarixli, Sumqayıt şəhəri, 16-cı məhəllə, ev 38a-da yerləşən Sumqayıt Dövlət Universitetinin 3-cü tədris korpusunda qazanxana və istilik sisteminin əsaslı təmiri ilə bağlı 38563 saylı rəyi alınmışdır. Azərbaycan Respublikası qanunvericiliyinə uyğun olaraq Dövlət Satınalmalarının Vahid İnternet Portalı (etender.gov.az) üzərindən qazanxana və istilik sisteminin əsaslı təmiri ilə bağlı tender elan edilmişdir. Tenderin nəticəsinə əsasən "Vedibasar İnşaat” MMC qalib elan olunmuşdur. Qalibin seçilməsi ilə bağlı tərtib edilmiş yekun protokol təsdiq üçün Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinə göndərilmişdir. 04.08.2025-ci il tarixində Agentlikdən daxil olan AİBNDA/SQ-6790/2025 nömrəli qərara uyğun olaraq "Vedibasar İnşaat” MMC ilə Sumqayıt Dövlət Universiteti arasında 07.08.2025-ci il tarixində müqavilə bağlanmışdır. Yeni qazanxana və istilik sistemi 3-cü tədris binasının istilik təchizatını davamlı və təhlükəsiz şəkildə təmin edəcək. Bu, universitetdə tələbə və müəllim heyətinin rahat, keyfiyyətli və sağlam tədris mühitində fəaliyyət göstərməsinə şərait yaradacaq. Professor-müəllim heyəti və tələbələr tərəfindən uzun müddətdir gözlənilən bu layihə kollektivin xüsusi sevincinə səbəb olub. Layihənin icrası eyni zamanda, Sumqayıt Dövlət Universitetinin maddi-texniki bazasının gücləndirilməsi və tədris infrastrukturunun müasirləşdirilməsi istiqamətində atılmış növbəti mühüm addımdır.
Xəbərdən istifadə edərkən istinad etmək vacibdir.
