Sentyabrın
12-də Sumqayıt Dövlət Universitetində iməclik keçirilib. İməclik
çərçivəsində universitetin bütün əməkdaşlarının iştirakı ilə kafedra,
auditoriya, laboratoriyalarda təmizlik işləri görülüb, universitetin
həyəti səliqə-səhmana salınıb, yaşıllıqlar, ağac və gül kolları əkilib,
həyətdə tələbələrin istirahəti
üçün düzəldilmiş oturacaqlar rənglənilib, əsas binanın həyətində
yerləşən yeməkxanada müəllim və tələbələr üçün otaqlar istifadəyə
yararlı hala gətirilib.
Təmir və yenidənqurma işləri çərçivəsində universitetin foyesinə ağ
mərmərlər döşənib, dəhliz və pilləkənlər yüksək səviyyədə təmir olunub,
auditoriyalar səliqəyə salınıb, texniki avadanlıqlarla təchiz olunub.
Kitabxananın təmiri və dərs vəsaitləri ilə komplektləşdirilməsi başa çatdırılıb.
Həmçinin,
ikinci korpusda bir çox vacib işlər görülüb, tədrisin keyfiyyətinin
artırılması üçün auditoriyalarda proyektorlar quraşdırılıb, elektron
lövhələr yerləşdirilib, tələbələrin asudə vaxtlarının səmərəli təşkili
üçün yeməkxana tam təmir olunub.
SDU-da
təhsil sisteminin informasiyalaşdırılması istiqamətində də ciddi işlər
görülüb. Sürətli internet şəbəkəsinə qoşulma imkanı tələbə və
müəllimlərin tədrisin prosesində yeni texnologiyalarla təhsil almasına,
normativləşməsinə şərait yaradır. Tədris laboratoriyalarının
modernləşdirilməsi başa çatdırılıb.
Azərbaycan Müəllimlər İnstitutunun Sumqayıt filialının ləğvi,
maddi-texniki bazası, pedaqoji və tələbə heyəti ilə birlikdə Sumqayıt
Dövlət Universitetinin nəzdinə daxil olması ilə əlaqədar olaraq pedaqoji
kadrların və tələbələrin öz ixtisaslarına uyğun yerləşdirilməsi
istiqamətində ciddi işlər görülür. Universitetin Filologiya fakültəsi
Azərbaycan Müəllimlər İnstitutunun Sumqayıt filialının binasına
köçürülərək avadanlıqlarla təmin olunub və bir çox təxirəsalınmaz işlər
görülüb.
Bilik gününə hazır olan Sumqayıt Dövlət Universitetinin hər bir
əməkdaşının amalı təhsilimizi yüksək səviyyəyə qaldırmaq və dövlətimizi
savadlı kadrlarla təmin etməkdir.
Xəbərdən istifadə edərkən istinad etmək vacibdir.
