Dekabrın 2-də FHN-in Sumqayıt Regional Mərkəzi "Fövqəladə hallar zamanı davranış və yanğın təhlükəsizliyi qaydaları” mövzusunda növbəti maarifləndirmə tədbiri keçirib.
Xeberle.com Fövqəladə Hallar Nazirliyinin saytına istinadla xəbər verir ki, tədbir Zülfü Hacıyev adına 17 nömrəli tam orta məktəbdə keçirilib.
Tədbirdə FHN Sumqayıt Regional Mərkəzinin, Sumqayıt şəhər Dövlət Yanğından Mühafizə İdarəsinin, Sumqayıt şəhər Təhsil Şöbəsinin əməkdaşları, məktəbin müəllim və şagirdləri iştirak ediblər.
Tədbir nəzəri və praktiki olmaqla iki hissədən ibarət olub.
Tədbirin nəzəri hissəsində Mərkəzin əməkdaşları "Fövqəladə hallar zamanı davranış qaydaları”, "Yanğın təhlükəsizliyi qaydaları”, "Məişətdə qaz cihazlarından düzgün istifadə qaydaları”, "Elektriklə davranış qaydaları”, "Zərərçəkmiş insanlara ilkin tibbi yardımın göstərilməsi” və "112” qaynar telefon xətti təhlükəsizliyimizin qarantıdır” mövzularında çıxışlar ediblər.
Çıxışlardan sonra Fövqəladə Hallar Nazirliyinin hazırladığı "Dəm qazı təhlükəsi” adlı videoçarx nümayiş olunub.
Daha sonra suallar cavablandırılıb və təbliğat materialları, bukletlər paylanılıb.
Praktiki hissədə məktəbin həyətində mərkəzin və Sumqayıt şəhər Dövlət Yanğından Mühafizə İdarəsinin qüvvə və texnikasına baxış keçirilib, onların təyinatı və istifadəsi qaydaları haqqında məlumat verilib.
Xəbərdən istifadə edərkən istinad etmək vacibdir.
