Sumqayıt şəhərində Texniki və Təbiət Elmləri Liseyi bu il qəbul imtahanlarında yüksək nəticə göstərib. Belə ki, məktəbin xeyli sayda məzunu 600-dən yuxarı bal toplayıb.

Texniki və Təbiət Elmləri Liseyinin direktoru Rüxsarə Məmmədova Xeberle.com-a açıqlamasında bildirib ki, bu il məktəbi bitirən 46 şagirddən 20 nəfəri 600-dən yuxarı bal toplayıb. Direktor qeyd edib ki, 600-dən çox bal toplayan 20 şagirdin 16 nəfəri bir sinifdə, 4 nəfəri isə digər bir sinifdə oxuyublar: "26 nəfər şagird olan sinfin 15 məzunu 600- 700 arası bal toplayıb. Bu il ən yüksək nəticəmiz 696 bal oldu. Sumqayıt üzrə ən yüksək balı məhz bizim məzunuz olan III qrup üzrə Elgün Cəfərov göstərib. Şagirdimiz Elxan Əliyev isə 690 bal toplayıb. Amma bizim istəyimiz tam alınmadı. Məzunlarımızdan 700 bal gözləyirdik”.

R. Məmmədova sözlərinə onu da əlavə edib ki, son 5 ildə lisey yüksək nəticələr göstərib: "Belə ki, son 5 il ərzində 1 nəfər 700, 10 nəfər 695, 1 nəfər isə 696 bal toplayıb. Qəbul faizi isə 100 faiz olub. Liseyi 7 nəfər "Qızıl medal”la bitirib, "Prezident təqaüdü”nə layiq görülüb".