Son zamanlar paytaxtda fəaliyyət göstərən "Kids Studio” bağçasında tərbiyəçilərin uşaqları döyməsi, onlara fiziki və psixoloji təzyiqlər göstərməsini əks etdirən videogörüntülərin yayılması geniş müzakirələrə səbəb olub. Bu müzakirələr əsnasında bir sıra suallar meydana gəlir ki, bunlardan biri də "özəl bağçalara kim nəzarət edir?” sualıdır.
Xeberle.com olaraq şəhərimizdə fəaliyyət göstərən özəl bağçalar və onlara kimin nəzarət etməsi ilə bağlı məlumat almaq üçün Sumqayıt şəhər İcra Hakimiyyəti (İH) başçısının birinci müavini Teymur Səmədov ilə əlaqə saxladıq. T.Səmədov bildirdi ki, sözügedən bağçalar özəl təşkilatdır və onların şəhər İcra Hakimiyyətinə heç bir aidiyyəti yoxdur:
"Sumqayıtda yalnız bir özəl bağça fəaliyyət göstərir və bütün kadr məsələlərini də özü həll edir. Çünki həmin bağça özəl təşkilatdır və Sumqayıt şəhər İH-yə heç bir aidiyyəti yoxdur. Bu bağçalar üçün İH tərəfindən xüsusi tələblər də qoyulmayıb”.
Qeyd edək ki, özəl bağçalarla bağlı açıqlamasında Azərbaycan Respublikasının Təhsil Nazirliyi sözügedən körpələr evi ilə bağlı lisenziyanın onlar tərəfindən verilmədiyini, yalnız bu bağçaların binalarının normativlərə uyğun olub-olmaması məsələsinə baxdıqlarını bildirib.
Elnarə Salamova
Xeberle.com
Xəbərdən istifadə edərkən istinad etmək vacibdir.
