Oktyabrın 1-dən dövlət ümumi təhsil müəssisələrində yaradılmış məktəbəhazırlıq qruplarında məşğələlərə start verilib.
Sumqayıt şəhər Təhsil Şöbəsindən "Xeberle.com" a verilən məlumata görə, pandemiya ilə əlaqədar olaraq sosial məsafə gözlənilməsi mümkün olmayan qruplarda məşğələlər yarımqruplar üzrə tədris olunacaq.
Məktəbəhazırlıq qruplarının yaradılmasında məqsəd 5 yaşlı uşaqların məktəb təliminə hazırlığı ilə əlaqədar psixoloji dayanıqlığını artırmaq, əhatə olunduqları aləmə və təhsil mühitinə uyğunlaşdırmaq, onların ünsiyyət və birgə fəaliyyət bacarıqlarına yiyələnməsini təmin etməkdən ibarətdir.
Məktəbəhazırlıq qruplarında "Ətraf aləmlə tanışlıq”, "Savad təliminə hazırlıq və nitq inkişafı”, "Bədii təfəkkürün inkişafı”, "Məntiqi və riyazi təfəkkürün inkişafı”, "Təsviri fəaliyyət”, "Musiqi” və "Fiziki mədəniyyət” dərs məşğələləri keçirilir.
Qeyd edək ki, 2020-2021-ci tədris ilində Sumqayıt üzrə 177 məktəbəhazırlıq qrupuna 3570 uşağın cəlb edilməsi nəzərdə tutulur. Sumqayıt şəhərində fəaliyyət göstərən 46 ümumtəhsil məktəbindən 41 də məktəbəhazırlıq qrup açılıb.
Xədicə Səxavətqızı
Xəbərdən istifadə edərkən istinad etmək vacibdir.
