Xeberle.com-un məlumatına görə, tədbirdə Milli Məclisin deputatı Hicran Hüseynova, Sumqayıt şəhər İcra hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Tərlan Hacızadə, İcra hakimiyyətinin İctimai-siyasi və humanitar məsələlər şöbəsinin müdir müavini Fərman Kazımov, Sumqayıt şəhər İcra hakimiyyəti başçısının 4 nömrəli sahə inzibati ərazi dairəsi üzrə nümayəndəsinin müavini Samir Bədəlov, məktəbin şəhid məzunları – Elnur Allahverdizadənin anası Süsən Həsənova və şəhid Ənvər İmanovun anası Mədinə İmanova iştirak edirdi.

Tədbiri məktəbin direktoru Gülnarə Babayeva giriş sözü ilə açaraq "Zəfər Günü”nün əhəmiyyətini, müasir Azərbaycan tarixində xüsusi mərhələ olduğunu qeyd edib.

Millət vəkili Hicran Hüseynova bildirib ki, Azərbaycan Respublikasının Prezidenti, Silahlı Qüvvələrin Ali Baş Komandanı İlham Əliyevin qətiyyəti, rəşadətli Ordumuzun şücaəti nəticəsində 30 ilə yaxın müddətdə işğal altında olan topraqlarımız işğaldan azad olunub. Vurğulayıb ki, qəhrəman hərbçilərimizin döyüş meydanında göstərdiyi şücaət nəticəsində 44 günlük Vətən Müharibəsində Azərbaycan qələbə qazanıb.

Deputat qeyd edib ki, Azərbaycan öz tarixi torpaqlarınızı azad etməklə ərazi bütövlüyünü bərpa edib: "Bu bütövlükdə regionda yeni vəziyyət yaratmışdır. Bu baxımdan regionun siyasi və iqtisadi aktuallığı durmadan artır. Xüsusilə də Zəngəzur dəhlizi açıldıqdan sonra bütün region ölkələri üçün yeni imkanlar yaranacaq. Bütün bunlar, öz növbəsində, azərbaycanlıların Zəngəzur, İrəvan, Basarkeçər və digər tarixi torpaqlarına qayıdışına səbəb olacaq”.

Sonra digər qonaqlar çıxış edərək xalqımızın şərəfli tarixindən, əsgər və zabitlərimizin igidliyindən, onlara dövlət tərəfindən göstərilən qayğıdan ətraflı bəhs ediblər.

Tədbirdə, həmçinin şəhidlər Elnur Allahverdizadənin və Ənvər İmanovun döyüş yolundan danışılıb. E. Allahverdizadənin Agdam- Xocavənd, Ə. İmanovun isə Xankəndi istiqamətində gedən döyüşlərdə şəhidlik zirvəsinə ucaldığı bilidirilib.

Tədbirin sonunda 41 nömrəli məktəbin şagirdləri tərəfindən hazırlanan ədəbi-bədii kompazisiya təqdim edilib.