Sumqayit  Dövlət Dram Teatrında  Şuşa şəhərinin işğalının 22-ci ildönümünə həsr edilmiş tədbir keçirilib. Sumqayıt şəhər İcra Hakimiyyətinin təşəbbüsü ilə keçirilən tədbir çərçivəsində  “Şuşanı xatırlayarkən...” adlı kompozisiya nümayiş olunub.  Kompozisiyanı izləyənlər arasında  Sumqayıt şəhər İcra Hakimiyyətinin Başçısı Eldar Əzizovla yanaşı, Dağlıq Qarabağın Azərbaycanlı İcmasının rəhbəri, Şuşa şəhər İcra Hakimiyyətinin başçısı Bayram Səfərov da olub. 

 “Şuşa sadəcə şəhər deyil, tarixi abidədir... Şuşa əsl istedadlar ocağıdır, görkəmli şəxsiyyətlərin vətənidir”. Bu sözləri 1996-cı ildə rayon ictimaiyyəti ilə görüşündə ümummilli lider Heydər Əliyev söyləyib.  Gecə məhz bu tarixi videoxronika kadrlarının nümayişi ilə başlanıb.

Xeberle.com  xəbər verir ki,  avropalılar Şuşanı “Qarabağ Qüdsü” adlandırırdılar. Bir neçə dəqiqəyə səhnədə bu möcüzəvi diyarın təşəkkülü və inkişafı xronologiyasını tədbir iştirakçılarının yaddaşında canlandıran dekorasiyalar yaradılıb. Şəhərin tarixi 1740-cı illərdən, Azərbaycanın Cavanşirlər sülaləsinin başçısı Pənahəli xanın Qarabağ hökmdarı olmağa cəhd göstərdiyi vaxtdan başlanır. O, Qarabağ xanlığını qorumaq üçün bir neçə qala tikdirib, 1750-ci ildə Şuşa qalasını ucaldıb. Onun yaratdığı şəhər-qala Qarabağın ürəyində mühüm istehkama çevrilib.

Bir-birini əvəz edən səhnələr öz ipəyi, daş döşənmiş küçələri, böyük daş malikanələri, əlvan naxışlı xalçaları və cins atları ilə şöhrət qazanmış Şuşadan söhbət açıb. Şuşa Azərbaycan poeziyasının beşiyidir. Buradan Vaqif və Xurşudbanu Natəvan kimi şairlər çıxıb.

Aktyorlar səhnədə məşhur şuşalıların obrazlar qalereyasını yaradıblar. Qasımbəy Zakir, Əbdülrəhimbəy Haqverdiyev, Süleyman Sani Axundov, Firudinbəy Köçərli, Yusif Vəzir Çəmənzəminli, Şərqdə ilk Azərbaycan Demokratik Cümhuriyyətinin ilk müdafiə naziri Səmədbəy Mehmandarov tamaşaçıların gözləri önündə canlanıb.

Azərbaycanlılar üçün Şuşa milli musiqi məbədi, beşiyidir. Bu diyar Azərbaycan musiqi sənətinin zirvəsi olan muğamın vətənidir. Azərbaycan klassik musiqisinin banisi Üzeyirbəy Hacıbəyli, dahi xanəndələr Cabbar Qaryağdıoğlu, Xan Şuşinski, Seyid Şuşinski, Rəşid Behbudov, Bülbül, bəstəkar Fikrət Əmirov və bir çox başqaları bu torpağın yetirmələridir.

Səhnədə quraşdırılmış monitorda nümayiş etdirilən slaydlar, videokadrlar tamaşanı daha baxımlı edib. Kompozisiyada ölkənin inkişafına da yer verilib. Müasir Azərbaycan regionda ön mövqe tutan sanballı dövlətdir.

“Azərbaycanın ərazi bütövlüyü heç vaxt müzakirə predmeti olmamışdır və ola da bilməz. Biz öz sərhədlərimizin bütövlüyünü bərpa edəcəyik!” Dövlət başçımız İlham Əliyevin hərbi paradda dediyi və tədbir iştirakçılarının alqış sədaları altında səsləndirilmiş bu sözlər çoxdan gözlənilən Qələbəyə inam oyadır. Şuşa üzərində Azərbaycan bayrağının dalğalanacağı gün uzaqda deyildir.

Fotolar: Xeberle.com