Azərbaycan Milli Elmlər Akademiyasının (AMEA) Sumqayıtda yerləşən Polimer Materialları İnstitutunnda əməkdaşlar arasında cərəyan edən gərginlik davam edir 

Saytımızda İnstitutun 5 saylı laboratoriyasının müdiri Vaqif Cəfərovla bağlı əməkdaşların narazılığını ifadə edən yazı dərc edildikdən sonra məsələyə aydınlıq gətirmək üçün müəssisənin Kadrlar şöbəsinin müdiri və hüquqşunası Əlibala Ağayev saytımıza müraciət edib. 

Ə. Ağayev faktı təsdiqləyərək bildirdi ki, bütün bu narazılıqlar Vaqif Cəfərovun kollektiv üzvlərinə qarşı ziyalıya yaraşmayan hərəkətlərindən qaynaqlanır: "74 yaşlı kimya üzrə fəlsəfə doktoru V. Cəfərov həm rəhbərlik etdiyi laboratoriyada, həm də digər əməkdaşlarla yerli-yersiz olduqca kobud davranır. Onun işlətdiyi ifadələri normal insan səsləndirməz, nəinki elmi müəssisənin vəzifəli şəxsi. V. Cəfərov namaz qılan əməkdaşları təhqir edərək onlara "dombalaq aşanlar” deyir. Dəhlizlərdə qarşılaşdığı əməkdaşları küçə söyüşləri ilə təhqir edir. Bu da institutda böyük narazılığa səbəb olur”.
Şöbə müdirinin sözlərinə görə, V. Cəfərov 1974-cü ildə kimya üzrə elmlər namizədliyini müdafiə etdikdən sonra heç bir elmi yeniliyə imza atmayıb. Buna baxmayaraq özünü bir çox yerdə "akademik” kimi təqdim edir: "Əslində bu gün onun laboratoriya müdiri işləməsi də institutun əsasnaməsinə ziddir. Çünki laboratoriyaya rəhbərlik edən şəxs 10 il ərzində doktorluğu medafiə etmirsə, bu vəzifədə qala bilməz. 42 il əvvəl elmlər namizədi olan V. Cəfərovun isə heç 42 elmi məqaləsi də yoxdur.”


Ə. Ağayev deyir ki, V. Cəfərovun əsas "məşğuliyyəti” institutun hörmətli alimlərinə qara yaxmaq, onların haqqında şər-böhtan dolu "donoslar” yazmaqdır ki, bu da instut alimlərinin fəaliyyətinə olduqca mənfi təsir göstərir: "Onun hərəkətləri göstərir ki, V. Cəfərovun psixi durumu yerində deyil. Biz dəfələrlə onun həkim yoxlamasından keçirilməsini rəhbərlik qarşısında qaldırsaq da nədənsə, buna laqeyd yanaşılır. Lakin belə gedərsə, V. Cəfərovun ruhi pozğunluqdan törəyən hərəkətləri instututda xoşagəlməz hadisələrə səbəb ola bilər.”
Xatırladaq ki, V. Cəfərov Azərbaycanın tanınmış və nəğməkar şairi Vahid Əzizin doğma qardaşıdır. Eyni zamanda onun haqqında deyilənlərin institut rəhbərliyinin laqeyd münasibət göstərməsi müammalı suallar yaradır. 

Qeyd edək ki, mövzu ilə bağlı qarşı tərəfin də mövqeyini işıqlandırmağa hazırıq.
sumqayitfakt.az