Sumqayıtda bir sıra kurslar, təlim-tədris mərkəzləri fəaliyyət göstərir. Son vaxtlar onların sayının artması, fəallığı müşahidə olunur. Hər birinin öz dəst-xəti, öz layihə və kurs siyasəti var. Bunlardan biri 2016-cı ilin əvvəlindən Sumqayıtda fəaliyyət göstərən "Next Tution Centre”dir. Son ayların uğurları, buranın əsas üstünlükləri, yeni layihələr, kadr seçimi barədə mərkəzin təsisçisi Kənan Məmmədovla söhbətləşdik. Xeberle.com həmin müsahibəni təqdim edir.

 

 

-Belə bir təlim-tədris mərkəzi yaratmaq ideyası hardan ağlınıza gəldi?

- Valideynlərim Sumqayıtda anadan olublar, burada işləyib yaşayırlar. Mən də eynilə və şəhərimizdən nə paytaxta, nə də ki başqa bir ölkəyə köçmək istəmərəm. Yəni ki, əsl sumqayıtlı sayıla bilərəm (gülümsəyir). Şəhərimizin əsas gücü böyük sənayesi, Sovet dövründə işləyən zavodlardan ibarət idi. 90-cı illərdən sonra bu tendensiya dəyişdi və hal-hazırda sakinlər bazarla dolanırlar, karyera qurmaq istəyənlər isə Bakıya üz tuturlar. Bu Sumqayıt üçün yaxşı hal deyil. Düzdür, ümumilikdə ölkəmizdə iqtisadiyyat sahələri inkişaf edir. Bu tezliklə bizim şəhərə də öz təsirin göstərəcək. Beləliklə, bu 2 məqamı: 1-ci şəhərimizi tərk etmək istəməməyim, 2-ci şəhərdə özəl sektorun canlanmasını - nəzərə alaraq bu şirkətin təməlin qoyduq.

- Öncə nədən başladınız ki, bugünkü səviyyənizə yetişdiniz?

- Səmimi deyim ki, hal-hazırdakı vəziyyətimiz məni qane etmir. Biz cavanıq, güclüyük və böyük potensialımız var. Daha da irəli getmək əzmindəyik.

-Bəs hazırda qarşınızda duran əsas məqsədlər hansılardır?

- Məqsədlərimiz çoxdur, amma icazənizlə, əsaslarını sadalayım. Misal üçün, biz çalışırıq həftə sonları ödənişsiz təlimlər keçirək. Bunun üçün ekspertlər həm öz şəhərimizdən, həm də ki paytaxtdan cəlb olunurlar. Burada bir neçə məqsədimiz var: İştirak edən gənclər ilk növbədə maariflənsinlər. İkincisi isə təlimçi ilə əlaqələri yaransın. Gələcəkdə hər hansı bir köməklik, ehtiyac yarandıqda müraciət etməyə "qapı” olsun. Hər birimizə bu həyatda bir müəllim lazımdır. Sonuncusu isə tanışlıq, eyni fikirli və motivasiyalı gənclər bir-birinə kömək olub, biznes qurub uğurlu insan ola bilərlər. Bu cür tədbirlər, əlbəttə ki, bizdən təşkilatçı olaraq xərc tələb edir (təlimçi ola bilər, kofe-nahar, məkan, avadanlıq xərcləri). Amma inanırıq ki, işimizin faydasını görəcəyik. Əsas bir müddətdən sonra paytaxta işləməyə gedən sakinlərimizin sayın azaltmaqdır.

- İndiyədək hansı istiqamətdə diqqətçəkən təlim və layihələr həyata keçirmisiniz?

- "Next Tuition Centre”nin fəaliyyəti bu ilin fevral ayının 2-dən başlayıb. İlk həyata keçirdiyimiz layihə "Ödənişsiz təlimlər festivalı oldu”. Arzu Qafarlı, Varis Yolçuyev, Ağahüseyn Əhmədov, Elşən Musayev, Elşən Rəhimov, Anar Xocayev, Zemfira Mustafayeva, Orxan Rzayev və s. ekspertlər, yazıçı və mütəxəsisslərlə fərqli-fərqli mövzularda təlimlər keçirildi. 2-ci uğurlu və maraqla qarşılanan layihəmiz SDU tələbələri ilə "Heydər Əliyevin əziz xatirəsinə” həsr olunan intellektual turnir oldu. Burda da bizi tək qoymadılar, bir neçə sponsor oldu. Ən xoş tərəfi isə bu idi ki, sponsorlar Sumqayıt şirkətləri idi. İndi bu turnirin davamlı olması üçün çalışırıq. Sonra 1 saylı peşə məktəbi üçün keçirdiyimiz motivasiya xarakterli təlim və s. Əlavə etmək istərdim ki, burada əsas məqsəd budur: hər kəs anlamalıdır ki, ali məktəbsiz, xüsusi bacarıq olmadan da həyatda uğur qazanmaq olar. Təki istək olsun və durmadan öz inkişafın üzərində çalışasan. Biz isə bacardığımız köməyi göstərəcəyik. Bu ildən abituriyent hazırlığına başlayırıq. Artıq müəllim seçimləri və metodika seçimləri sona çatıb. İnanırıq ki, təklif etdiyimiz qiymətlər sakinlərə sərfəli olacaq və köməyimiz ilə abituriyentlər daha yaxşı bal toplayacaq, yüksək nəticələr göstərəcəklər.

- Sizi rəqiblərinizdən fərqləndirən hansı xüsusiyyətlər var? Yəni bir sumqayıtlı gənc nə üçün məhz sizi seçməlidir?
- Rəqib dedikdə, Sumqayıt bazarı Bakıdan çox fərqlənir. Təhsil sektorunda təcrübəmiz olduğundan və bu istiqamətdə sakinlərimizə daha effektiv xidmət göstərə biləcəyimizdən əminik. İkincisi isə bu sahədə şəhərdə lider olan mərkəz yoxdur. Əsas 2-3 mərkəz var idi, digərləri isə nisbətən kiçik. Düşünürəm, biz balansı dəyişə bildik. Fərqliliyimiz çoxdur, real nümunə ilə göstərim: Bizim tədris mərkəzdə şəhərimizdə ilk ACCA dərsləri keçirilir, həm də ACCA və Azərbaycan Respublikası Auditorlar Palatasının partnyoru olan "Barattson” şirkəti ilə bizim tədris mərkəzi ilk "Java” kursunu keçirir. Bir maraqlı faktı da qeyd edim ki, Sumqayıtda ilk ispan dili dərsi də hal-hazırda bizdə keçirilir. Yəni bizim tədris mərkəzimiz daha çox real xidmətlər təklif edir. Niyə real?! Məsələn, bir xidmət təklif etmək üçün ilk bu sahədə peşəkar müəllim, sonra dərs vəsaiti və metodika seçdikdən sonra xidməti kütləyə təklif edirik. Peşəkar heyət - müəllim seçimi deyərdim burada ən çətin məsələdir. Çünki bizim keyfiyyətimizin göstəricisi onlardır, işçi heyəti isə bizlə ilk gündən bərabər addımlayan, kreativ və pozitiv gənclərdir. İnanıram ki, birlikdə daha fərqli və xeyirli işlər görəcəyik. Biz ümumiyyətlə hər bir detala fikir verməyə çalışırıq. Məsələn, yenicə istifadəyə verilən web-səhifəmizi (müştərilərin rahatlığı üçün) qeyd edərdim. Tam hüquqi şirkət olaraq rəsmi sertifikat təltifi kimi hər bir keyfiyyət xüsusiyyətlərinə diqqət edirik. Bizim şüarımız belədir: "Bizimlə tədris maraqlı və əlçatandır” - yəqin bu da bizi fərqləndirən bir cəhətdir.

Xəbərdən istifadə edərkən istinad etmək vacibdir.