Hər il olduğu kimi, bu il də ali məktəblərə qəbul imtahanlarında sumqayıtlı abituriyentlər yüksək nəticələri ilə fərqləniblər. Xəbər verdiyimiz kimi, fərqlənənlər arasında yalnız gimnaziya və lisey məzunları deyil, tam orta məktəblərin də məzunları var.
Məsələn, Sumqayıt şəhər 1 nömrəli tam orta ümumtəhsil məktəbinin 695 bal toplayaraq Azərbaycan Respublikası Prezidenti Yanında Dövlət İdarəçilik Akademiyasının Hüquqşünaslıq fakültəsinə qəbul olan məzunu Hacıyeva Aytən Rafiq qızını, eləcə də 34 nömrəli tam orta məktəbin 692 bal nəticə göstərərək tələbə adını qazanan məzunu İbrahimova Fidan Mənsur qızını da göstərə bilərik.
Sumqayıtda daha məktəb var ki, uzun müddətdir həmin təhsil müəssisəsinin məzunlarından yüksək bal toplayana rast gəlinmirdi. Amma bu il həmin məktəbin bir məzunu adını yüksək bal toplayanlar sırasına yazdıra bildi.
Söhbət - Sumqayıt şəhəri 9 saylı tam orta məktəbindən gedir. Bu il sözügedən məktəbin 43 məzunundan 36 nəfəri tələbə adını qazanıb. Məzunlardan 8-i 500-dən yuxarı, 3 məzun isə 600-dən çox bal toplayıb.
Ən əsası, məktəbin məzunu Məmmədova Nazilə Eyvaz qızı 654 bal nəticə göstərərək ADA Universitetinin İctimai münasibətlər fakültəsinə qəbul olub.
Bu nəticə 9 nömrəli məktəbin son 25 ildə göstərdiyi ən yüksək nəticədir.
Xeberle.com
Xəbərdən istifadə edərkən istinad etmək vacibdir.
