İyunun 14-də "Son zəng” tədbirləri Azərbaycanın müxtəlif şəhər və bölgələrində olduğu kimi, Sumqayıt şəhər məktəblərində də təntənəli şəkildə qeyd olunub. 8-ci mkr-da yerləşən Zülfü Hacıyev adına 17 saylı tam orta məktəbin "Son zəng” tədbiri də maraqlı və diqqətçəkən olub. Əməkdaşlarımız bu dəfə adıçəkilən təhsil müəssisəsindən reportaj hazırlayıblar. Mərasimin qonaqları sırasında Şəhər İcra hakimiyyətinin başçısının birinci müavini Faiq Kərimov, Sumqayıt şəhər təhsil şöbəsinin metod kabinetinin müdiri Şəhla Bağırova,  46 saylı bağçanın müdirəsi Mətanət Əliyeva, Azərkimya İstehsalat Birliyinin şöbə müdiri Fikrət Əliyev və başqaları iştirak ediblər. Məktəbin direktoru Mehriban Nəcəfova təəssüratlarını Xeberle.com-la bölüşüb. İllər uzunu təhsil sahəsində olan təcrübəsindən, buraxılış sisinlərindən söhbət açıb:   

 

"1988-ci ildən ilk əmək fəaliyyətinə müəllim kimi başlamışam. Bu günə qədər də, müəllim olaraq işləyirəm. Amma 2008-ci ildən, Sumqayıt şəhər 24 saylı tam orta məktəbinə direktor təyin olunmuşam. 2016-cı ildən bugünkü günə qədər isə bu məktəbdə direktor əvəzi kimi işləyirəm. Direktor təyin olunandan, bu məktəbdə ikinci buraxılışdır ki, yola salıram. Yeri gəlmişkən, bu il 3 müəllimimizi isə təqaüdə yola saldıq. Onların əmək müqaviləsi bir neçə dəfə artırıldı. Bunlar ibtidai sinif, Azərbaycan və ingilis dillindən dərs deyən müəllimlər idi.
M.Nəcəfova hazırkı buraxılışın bəzi çətin tərəfləri haqqında danışıb:
” Mən bu məktəbə direktor təyin olunanda, bəzi qəribəliklərlə üzləşdim. 11-ciləri görəndə sanki, şagird yox, müğənni sandım.Saçları uzun, məktəbli geyimləri yox idi. Əziyyətimin bəhrəsi olaraq bir ay içində şagirdləri məktəbli geyiminə keçirə bildim. İndiki ilə, o şagirdlər arasındakı fərq böyükdür. O, vaxt çətin tərbiyə olunan şagirdlərin hamısı bu məktəbə yığılmışdır. Amma bu il nümunəvi ailələrin, nümunəvi şagirləri kimi ayrılırıq məzunlarımızdan. İki sinfimiz var: 11A və 11B. İki sinifdə 37 şagird  təhsil alır. Onların böyük əksəriyyəti birinci hissədəki qəbul imtahanına iş vermişdilər və yaxşı nəticələr əldə ediblər. Əvvəlki illərin məzunları ilə müqaisədə (2-3 il əvvəl) 1-5% intervalla şagirdlərimiz ali məktəbə daxil olurdusa, keçən ilki məzunlarımızın 50%-ə yaxın nəticə göstərdilər. Bu il isə, inanıram ki 70%-lik qəbul olacaq.
Direktor əlaçıların faiz nisbəti və onlardan gözləntiləri barədə də fikirlərini bildirib:
"37 şagird arasında  4 və 5 qiyməti ilə oxuyanların  faiz nisbəti 40% təşkil edir. Amma bunlardan, 40%-dan yuxarı qəbul gözləyirik. Bu nəticə də, məni çox arxayın salmır. Bir müqayisə aparaq. İki il bundan əvvəl IX siniflərim ölkə üzrə 506-cı yerdə idi. Builki IX siniflərim 206-cı yerdədirlər. İki il ərzində 300 pillə irəli qalxmışıq. Hesab edirəm ki, bu qədər əziyyətin bəhrəsi olaraq göstərilən nəticə məni qane etmir. Bu il, iyunun 17-sindəki nəticələrlə daha da, ön sıralarda olmaq istəyirik.
Mehriban Nəcəfova sonda məzunlara arzu və tövsiyələrini də deyib:
"Əvvəl oxumaq deyirdim. İndi isə, zəhmətkeş, vətənpərvər və ən əsas insan olmaq. Oxumaq da, öz yerində. Öncə, elinə - obasına, dövlətinə, millətinə yararlı övlad olmaq lazımdır”.
Məzunlar və müəllimlər da "Son zəng” tədbirində öz təəssüratlarını həvəslə bizimlə bölüşüblər.
Azər Məhəmməd oğlu Həsənov(11B) – Məktəbi bitirməyə sevinmirəm. Kövrəlirəm ki, orta məktəbdən ayrılıram. Bir də, bu uşaqlarla bir araya gəlməyəcəm, bir partada əyləşməyəcəm. Müəllimlərimiz üçün də, darıxacam. Ən çox da, Rəmayə  və Aybəniz müəllimə üçün.  Arzum Polis Akademiyasına qəbul olmaqdır.
Ləman Alik qızı Hüseynzadə (11A) – Kədərliyəm. Sinif yoldaşlarım və müəllimlərimdən ayrılmaq istəmirəm. Ən yadda qalan müəllimlərim sinif rəhbərim Arzu və Azərbaycan dili müəlliməm Rəna xanımdır. Arzum Azərbaycan Turizm İnsitutuna qəbul olmaqdır.
Aygün Etibar qızı Əhmədova ( 11A) – Pis oluram. Düzdür, yeni həyata qədəm qoyuram. Yeni tanışlıqlar, tələbəlik həyatı... Amma sinif yoldaşlarımın yeri qəlbimdə tam başqadır. Ən yaddaqalan pedaqoq kimi birinci sinif müəllimim Xalidə xanımın adını çəkərdim. İxtisasca isə, Azərbaycan Dillət Universitetinə qəbul olaraq, tərcüməçi olmaq istəyirəm.
 Rəmayə Məhəmməd qızı Mustafayeva: - İxtisasca Azərbaycan dili müəlliməsiyəm. 1970-ci ildən göndərişlə bu məktəbə gəlmişəm. Artıq, 65 yaşım tamam olur. Hər il yola saldığım məzunlarımla fəxr etmişəm. Çünki, onlar müxtəlif peşə və sənətlərdə çalışırlar. Onların adları və uğurları mənim mükafatımdır. Artıq, neçənci buraxılış olduğu yadımdan çıxıb. Bu il məzunlarımız kimi mənim də, son zəngimdir. İstərdim ki, bu ilki məzunlarımın da, səsi yüksəklərdən gəlsin.
 Arzu İmanqulu qızı  Məmmədova :- İxtisasca Riyaziyyat müəlliməsiyəm. 20 ildir bu məktəbdəyəm. 3-cü buraxılışımdır ki, yola salıram. Keçənilki buraxlışım çox uğurlu olub. İndi onlar müxtəlif peşə sahibləridi: həkim, hüquqşünasdır. Bu məzunlara da, uğurlar arzulayıram. Səsləri xarici ölkələrin təhsil ocaqlarından gəlsin.
Biz də öz növbəmizdə həm 17 saylı, həm də şəhərimizin digər məktəblərinin bütün məzunlarına və müəllimlərinə uğurlar və təhsil nailiyyətləri arzu edirik!
Xeberle.com
   

 

 

 

 

 

 

 

 

 

 

 

 

 

 

 

 

 

 

Xəbərdən istifadə edərkən istinad etmək vacibdir.