Sumqayıt təhsili ölkədə həmişə birincilər cərgəsində olub. Abituriyentlər bu il də öz nailiyyətləri ilə doğmalarını sevindirməklə yanaşı, təhsil aldğı müəssisələrin də nailiyyətini artırıb, onlara uğur bəxş ediblər. Şəhərdə ən yaxşı nəticə göstərən orta təhsil müəssisələri liseylər olduğundan onların nailiyyətləri ilə bağlı kiçik bir araşdırma apardıq. Beləliklə, Sumqayıtdakı gimnaziya və liseylərin builki nəticələri və yüksək bal toplayan məzunların hansı ali məktəbi seçmələri ilə bağlı materialı təqdim edirik.

"Texniki və Təbiət Elmləri Lisey"inin (TTEL) direktoru Rüsxarə Məmmədova Xeberle.com-a açıqlamasında bildirdi ki, bu il liseydə ali məktəblərə qəbul olma faizi 100 % olub: "Bu il liseydən 41 nəfər məzun olub ki, onların hamısı da tələbə adını qazanmağı bacarıblar. Onlardan 12-si 600 balı keçərək tələbə adını qazanıblar. Ən aşağı bal isə 364 bal olub".

 TTEL-in ən yüksək bal toplamış 3 məzunu:

1. Salamzadə Yaqub - 687 bal, Bakı Dövlət Universiteti – Hüquqşünaslıq;
2. Şükürova Məlahət - 687 bal, Azərbaycan Respublikasının Prezidenti yanında Dövlət İdarəçilik Akademiyası – İqtisadiyyat;
3. Muradova Samirə - 652 bal, Azərbaycan Tibb Universiteti - Müalicə işi.

"Təbiət Elmləri Təmayüllü Gimnaziya"nın (TET) direktoru Nizami Əhmədov bildirdi ki, 11-ci sinifi bitirən məzunların 43-ü 600 balı keçib: "Bu il gimnaziyadan 59 nəfər məzun olub ki, onların hamısı da tələbə adını qazanıblar. 43 nəfər isə 600 balı keçib. Bu il üçün ortalama bal 610 bal olub, keçən il isə orta bal 594 idi. Nəticəmizə görə Respublikamızda birincilərdənik. Ən aşağı bal isə 307 bal olub".

TET-in ən yüksək bal toplayan 5 məzunu:
1. Əfəndiyev Eldar - 700 bal, Azərbaycan Tibb Universiteti - Müalicə işi;
2. Mahmudlu Leyla - 695 bal, Bakı Ali Neft Məktəbi - Proseslərin avtomatlaşdırılması;
3. Həsənova Aytac - 690 bal, Bakı Ali Neft Məktəbi - Proseslərin avtomatlaşdırılması;
4. Feyzullayeva Səbinə - 690 bal, Azərbaycan Tibb Universiteti - Müalicə işi;
5. Nəcəfli Eyvaz - 690 bal, Bakı Ali Neft Məktəbi - Proseslərin avtomatlaşdırılması.

"Təfəkkür" liseyinin direktoru Gülbahar Haqverdiyeva qeyd etdi ki, bu il liseyi bitirən məzunların hamısı tələbə adını qazanıb: "Bu il liseydən 40 nəfər məzun olub və onların hamısı qəbul imtahanında iştirak edərək, tələbə adını qazanıblar. Məzunlarımızdan 7 nəfəri 600 balı keçib. Ortalama balımız bu il 487 bal olub, ən aşağı nəticə isə 245 bal olub".

"Təfəkkür" liseyinin 3 ən yüksək bal toplamış məzunu:
1. Feyzullayev Abdulla - 692 bal, Azərbaycan Respublikasının Prezidenti yanında Dövlət İdarəçilik Akademiyası – Hüquqşünaslıq;
2. Behbudov Heydər - 665 bal, Azərbaycan Tibb Universiteti - Müalicə işi;
3. Məmmədli Nihad - 662 bal, Bakı Dövlət Universiteti - Tarix.

"İstedad" liseyinin direktoru Adilə Süleymanovadan da açıqlama almağa çalışdıq. Lakin telefonlarımıza cavab verən olmadı.
Tələbə adını qazanan gənclərimizi Xeberle.com adından təbrik edirik. Ümid edirik ki, Sumqayıt təhsili 2017-2018-ci il tədris ilində builkindən daha yüksək nəticələr əldə edəcək.

Hicranə İsmayılova
Xeberle.com