20
Yanvar faciəsi Azərbaycan xalqının ümumxalq faciəsi olmaqla yanaşı, eyni
zamanda müstəqillik, istiqlal və hürriyyət uğrunda apardığı milli-azadlıq hərəkatının zirvəsi
kimi tariximizə həkk olunub. Tariximizin bu səhifəsi imperiya güllələrinin səsi
ilə açılsa da, şəhidlərimizin qanı ilə yazıldı. Bu tarixi faciəni anmaq hər bir
Azərbaycan vətəndaşının milli-mənəvi borcudur. Bu məqsədlə Sumqayıt şəhər 8 nömrəli tam orta məktəbin yuxarı sinif şagirdlərinin iştirakı ilə şəhərimizin
möhtəşəm Bayraq Muzeyində "20 Yanvar
faciəsi XXI əsr gənclərinin gözü ilə” adlı tədbir keçirilmişdir. Tədbiri giriş
sözü ilə STŞ-nin metodkabinetinin direktor əvəzi G. Haqverdiyeva açaraq mövzu ilə bağlı fikirlərini
demiş və 20 Yanvar gününün Azərbaycanın suverenliyi, istiqlaliyyəti, ərazi bütövlüyü uğrunda mübarizənin rəmzi və
müstəqilliyimizin başlanığıcı günü olduğunu xüsusi qeyd etmişdir. Tədbir dəyirmi
masa ətrafında şagirdlərin faciə ilə bağlı tarixi faktlara əsaslanan fikirləri
ilə davam etmişdir. Onlar qeyd etdilər
ki, 20 Yanvar faciəsi Azərbaycan
xalqının iradəsini, milli-azadlıq
uğrunda mübarizə əzmini qıra bilmədi. Qəhrəman
Azərbaycan xalqı nəyə qadir olduğunu sübut etdi.
Məktəbin
direktor əvəzi Ruhiyyə Abdullayeva tədbiri yüksək səviyyədə hazırladıqlqrına
görə məktəbin müəllimləri Tahirə Daşdəmirovaya, Sevinc Quliyevaya və şagirdlərə
minnətdarlığını bildirərək 20 Yanvar faciəsinin xalqımızın tarixində qəhrəmanlıq
salnaməsi olduğunu bildirdi.
Sonda tədbir iştirakçıları muzeyi gəzərək bələdçinin verdiyi məlumatlar əsasında qədim
Azərbaycanın tarixi ilə yaxından tanış oldular.
Sevinc Quliyeva,
8 nömrəli tam orta məktəbin tarix müəllimi
Xəbərdən istifadə edərkən istinad etmək vacibdir.
