Xəbər verdiyimiz kimi, iyunun 14-də Azərbaycanda 2017/2018-ci dərs ili başa çatacaq və bütün ümumitəhsil müəssisələrində son zəng çalınacaq.
"Son zəng” tədbiri ilə əlaqədar demək olar ki, hər il avtomobillərin hərəkətində sıxlıq müşahidə olunur və yeniyetmələr tərəfindən müxtəlif yol-nəqliyyat hadisələri törədilir.
Xeberle.com xəbər verir ki, mövzuyla bağlı Sumqayıt Polis İdarəsinin Dövlət Yol Polisi Şöbəsinin baş dövlət avtomobil müfəttişi Loğman İsmayılov bildirib ki, qurum "Son zəng” tədbirləri ilə bağlı gücləndirilmiş iş rejimində çalışacaq.
L. İsmayılov bir sıra tövsiyələr də verib: "Sabah küçə və yollarda qrup halında gəzən şagirdləri diqqətli olmağa çağırıram. Yolun hərəkət hissəsinə çıxmayın, sizin üçün ayrılmış səkilərdən, zebra xətlərdən, piyada keçidlərindən istifadə edin. Yolu keçərkən diqqətli olun və nəqliyyat vasitəsinin yaxınlaşmasına həssaslıqla yanaşın. Qrup halında yolu keçirsinizsə, bir-birinizi gözləyin”.
Xeberle.com
Xəbərdən istifadə edərkən istinad etmək vacibdir.
