Gələn il keçiriləcək buraxılış imtahanlarında bəzi məqamlar abituriyentlər üçün aktuallığını qorumaqda davam edir.
Ən çox maraq doğuran məsələlərdən biri də orta təhsil müəssisələrinə,
xüsusilə də Tibb kolleclərinə qəbul qaydaları ilə bağlıdır.
Dövlət İmtahan Mərkəzindən verilən məlumata görə, Respublikada fəaliyyət
göstərən Tibb kolleclərinə 9 illik bazada qəbul aparılmır. Yalnız XI
sinifdə təhsil alan abituriyentlər və əvvəlki ilin məzunları Tibb
kollecinə daxil ola bilmək üçün müsabiqədə iştirak edə bilərlər.
Tam (11 illik) orta təhsil bazasında orta ixtisas təhsili
müəssisələrinin ixtisaslarına qəbul yenə də buraxılış imtahanının
nəticələrinə əsasən aparılacaq. Əvvəlki illərin məzunları isə buraxılış
imtahanı formatında Azərbaycan (rus) dili, riyaziyyat və xarici dil
fənlərindən qəbul imtahanı verəcəklər.
Qeyd edək ki, V qrup üzrə ali təhsil müəssisələrinin və tam (11 illik)
orta təhsil bazasında orta ixtisas təhsili müəssisələrinin xüsusi
qabiliyyət tələb edən ixtisaslarını seçən abituriyentlərin hamısı,
əvvəlki illərdə olduğu kimi, qabiliyyət imtahanı da verəcəklər.
IX siniflər üzrə buraxılış imtahanlarının birinci mərhələsinin mart,
ikinci mərhələsinin isə iyunda keçirilməsi nəzərdə tutulub. XI siniflər
üzrə isə bu imtahanlar apreldə keçiriləcək.
(azedu.az)
Xəbərdən istifadə edərkən istinad etmək vacibdir.
